आफूलाई ‘केटो’ भनेर सम्बोधन गर्ने प्रधानमन्त्री केपी शर्मा ओलीलाई नेकपा (प्रचण्ड-नेपाल) समूहका स्थायी कमिटी सदस्य योगेश भट्टराईले जवाफ फर्काएका छन्।
कामचलाउ प्रधानमन्त्री ओलीले शनिबार काठमाडौंमा आयोजित आफ्नो समूहको नेकपा प्रदेश १ सम्पर्क कमिटीको भेलामा नेता भट्टराईलाई ‘आफैंले नेता र मन्त्री बनाइदिएको केटाले अहिले आफैंलाई लात हानेर हिँडेको’ भनी टिप्पणी गरेका थिए। पूर्वएमाले खेमाका नेता भट्टराई ओली समूह छाडेर प्रचण्ड-माधवकुमार नेपाल नेतृत्वको नेकपामा लागेपछि ओली रुष्ट भएका हुन्।
‘केटा र केटीहरूको रगत, पसिना र मेहनतको जगमा खडा भएको व्यवस्थामै यहाँले कुर्सी प्राप्त गर्नुभएको हो,’ प्रधानमन्त्री ओलीलाई शनिबार राति सामाजिक सञ्जालमार्फत जवाफ दिँदै पूर्वमन्त्री भट्टराईले भनेका छन्, ‘केटो भनिपाउँदा मलाई दुःख छैन। तपाईंको स्तर थाहा पाएँ खुसी लाग्यो।’
