रामेछाप – रामेछापको उमाकुण्ड गाउंपालिका १ मा पर्ने क्यामा खोलामा निर्माणाधिन पक्की पुल ३ बर्ष देखि अलपत्र छ । स्थानीय सडक पुल कार्यक्रम अन्तरगत तत्कालिन जिल्ला विकास समितिले उक्त पुल निर्माण थालेको थियो ।
३ बर्ष अघि कार्यक्रम मार्फत ठेक्का लागेको क्यामाखोला पुलको जगमा हालिएका रडहरु बांगिएका छन । बाढीले केहि भागमा क्षति समेत पुगेको छ । पुलको उत्तर तर्फको जगको जमिन सम्मको काम पुरा भएको र दक्षिण तर्फको भागमा जमिन मुनिकै काम सकिएको छैन ।
वडा अध्यक्ष नुर्बु शेर्पाका अनुसार अलपत्र परेको उक्त पुलको काम अघी बढाउनका लागि धेरै निकायमा धाएपनि अहिले सम्म गति पाउन सकेको छैन । खम्पाचे थापा जेभिले उक्त पुलको काम गर्ने संझौता गरेकोे थियो ।
जिल्ला विकास समिति विघटन भएको र स्थानिय पुल कार्यक्रमले समेत हात झिकेकोले उक्त पुलको काम कस्ले हेर्ने भन्ने विषयमा अन्यौल हुदा ३ बर्ष सम्म पुल रोकिएको हो । उक्त पुल अव प्रदेश सरकारको पूर्वाधार विकास कार्यालयले हेर्ने गरी जिम्मेवारी पाएको छ ।
पूर्वाधार विकास कार्यालय रामेछापका प्रमुख सोमराज तिमिल्सिनाका अनुसार चालु आर्थिक बर्षका लागि क्यामा खोलापुल निर्माणमा ५३ लाख रुपैयाको अख्तियारी प्राप्त भएको छ । कार्यालयले साविककै ठेक्का संझौता बमोजिम पुलको बांकी निर्माण कार्य गर्नका लागि निर्माण व्यवसायीलाई पत्राचार गरेको समेत तिमिल्सिनाले वताएका छन ।
निर्माण व्यवसायी बलराम श्रेष्ठले ठेक्का लगाएपनि कार्यालयको पुनर्संरचनाका कारण अख्तियारी कुनै निकायमा नआएकोले पुलको काम रोक्नु परेको वताए । कुन निकायले पैसा भुक्तानी गर्ने भन्ने कुराको टुंगो थिएन श्रेष्ठले भने – अहिले प्रदेशको पूर्वाधार विकास कार्यालयबाट पत्र पाएका छौं, अव काम अघी बढ्छ ।
गुम्देल रामेछापको सवैभन्दा दुर्गम क्षेत्रमा पर्छ । उक्त पुल निर्माणपछि क्यामा र लाहाछेवर क्षेत्रमा आवत जावतमा सहज हुनेछ । हिउंदमा मात्र सवारी साधन गुड्दा क्यामा र लाहाछेवर क्षेत्रका बासिन्दालाई दैनिक उपभोग्य वस्तुको ओसारपसार र स्थानीय कृषि उपज वजार सम्म लैजानका लागि कठिनाई वेहोर्नुपरेको छ । गुम्देलबाट लाहाछेवर पुग्न पैदल ७ घण्टा लाग्छ । मोटर पुल वनेको अवस्थामा उक्त दुरी करिव २ घण्टामा थिचोलिन्छ । लाहाछेवर र क्यामामा चिज, छुर्पी, आलु, सेतो सिमी र वा वाहिर निकासी गर्ने स्थानीय उत्पादन हुन ।
३ बर्ष देखि अलपत्र क्यामा पुल
