आगामी प्रदेश तथा प्रतिनिधि सभा निर्वाचनमा सत्ता गठबन्धनका दलहरुबीच सिट बाँडफाँटका लागि गठित कार्यदलको बैठक बिहीबार पनि जारी छ।
प्रधानमन्त्रीको सरकारी निवास बालुवाटारमा जारी बैठकमा सिट बाँडफाँटको मोडालिटीबारे छलफल भइरहेको नेताहरुले जानकारी दिएका छन्। आगामी निर्वाचनमा नेपाली कांग्रेसले सत्ता गताबंधनको सिट बाँडफाड संख्यामा लचक हुने भएको छ।
बालुवाटारमा बसेको शीर्ष नेतासहित गठबन्धन बैठकमा यसअघि दाबी गरेको सय सिटबाट कांग्रेस तल झरेको एक नेताले बताए। ती नेताका अनुसार कांग्रेसले ९० सिट प्रत्यक्षमा पाउनुपर्ने नयाँ प्रस्ताव गरेको छ।
कांग्रेस लचक भएपछि नेकपा माओवादी केन्द्र, एकीकृत समाजवादी र जनता समाजवादी पार्टी (जसपा) पनि आफ्नो अडानबाट पछि हट्न तयार छन्।
माओवादी केन्द्रले ६० सिटमा दाबी गरेको छ। यस्तै नेकपा एकीकृत समाजवादीले ४०, जसपाले ३५ र राष्ट्रिय जनमोर्चाले २ सिटमा दाबी गरेका छन्।
पहिला कांग्रेसले सहमति गर्नुपर्ने उनीहरुको सर्त छ। स्रोतका अनुसार चार दलले कांग्रेसलाई ८० देखि ८५ सिटमा ल्याएर सहमति गराउन चाहेका छन्।
अन्य चार दलले ७५ देखि ८० सिट बाँडफाँट गर्न चाहेका छन्। शीर्ष नेतासहितको कार्यदलको बैठक बुधबार पनि बसेको थियो। सिट संख्यामा सहमति गरेपछि मात्र निर्वाचन क्षेत्रमा छलफल गर्ने गठबन्धनको तयारी छ।
प्रत्यक्षतर्फका प्रतिनिधि सभाको १ सय ६५ र प्रदेश सभाको ३ सय ३० सिटमा सिट बाँडफाँट गरेर गठबन्धन चुनावी अभियानमा जाँदैछ।
