नेकपा एमाले कैलालीका पूर्वअध्यक्ष तथा सुदूरपश्चिम प्रदेशसभा सदस्य रतन थापासहित ६ जनालाई एमाले कैलालीले साधारण सदस्यसमेत नरहने गरी पार्टीबाट निकालेको छ।
एमाले कैलालीका कार्यवाहक अध्यक्ष दुर्गाप्रसाद जोशीले विज्ञप्ति जारी गर्दै पार्टीको विधानको धारा ८१ को उपधारा १ बमोजिम उनीहरूलाई कारबाही गरिएको जनाएका छन्।
वैशाख ३० गते सम्पन्न स्थानीय तहको निर्वाचनमा अन्तरघात गरेको भन्दै अध्यक्ष पदबाट बर्खास्त गरिएका थापा बिहीबार मात्रै नागरिक उन्मुक्ति पार्टीमा प्रवेश गरेका थिए।
उनीसँगै एमालेले उनकी पत्नीसमेत रहेकी लम्कीचुहा नगरपालिकाकी निवर्तमान उपमेयर टिका थापा, तुला थापा, धरम थापा, दुजराम चौधरी र पूर्ण साउदलाई पनि कारबाही गरेको हो।
त्यस्तै, स्थानीय तहको निर्वाचनमा अन्तरघात गरेको भन्दै पार्टीले कारबाही गरेका नेकपा एमाले कैलालीका निवर्तमान जिल्ला अध्यक्ष रतनबहादुर थापा नागरिक उन्मुक्ति पार्टीमा प्रवेश गरेका छन्।
एमालेका सुदूरपश्चिम प्रदेशसभा सदस्य समेत रहेका थापा सहित थुप्रै नेता नागरिक उन्मुक्ति पार्टी प्रवेश गरेको कैलाली अध्यक्ष कैलाश चौधरीले जानकारी दिए।
उनका अनुसार बिहिबार संघीय राजधानी काठमाडौंमा आयोजित पार्टी प्रवेश कार्यक्रममा थापा सहित एमाले पूर्वसांसद हिमाञ्चल भट्टराई, भूमिका चौधरी लगायत नेताहरुलाई अध्यक्ष रञ्जिता श्रेष्ठले टीका लगाएर स्वागत गरेकी छन्।
०७८ पुसमा सम्पन्न एमाले कैलालीको अधिवेशन अन्तर्गत भएको चुनावमा रणबहादुर चन्दलाई ४ मतान्तरले पराजित गर्दै थापा अध्यक्षमा विजयी भएका थिए। उनलाई स्थानीय तह निर्वाचनमा अन्तरघात गरेको आरोपमा एमालेले अध्यक्षबाट हटाएको थियो।
उनी एमालेबाट सुदूरपश्चिम प्रदेश सभामा प्रतिनिधित्व गर्ने सांसद पनि थिए। थापा कैलाली निर्वाचन क्षेत्र नम्बर २ ९१० मा ०७४ सालमा एमालेबाट विजयी भएका थिए।
एमालेको तर्फबाट सुदूरपश्चिम प्रदेशसभा सदस्य समेत रहेका थापालाई स्थानीय तहको चुनावमा अन्तर्घात गरेको आरोपमा एमालेले जिल्ला अध्यक्षबाट हटाएको थियो ।
