नेपाल–भारत सीमामा आपराधिक घटना बढेको भन्दै सीमामा काँडेतार लगाउन सत्तारुढ दलकै सांसदले माग गरेकी छिन् ।
शुक्रवार बसेको प्रतिनिधिसभा बैठकको शून्य समयमा जसपा सांसद रेनुका गुरुङले भारत–पाकिस्तान, भारत–बंगलादेश जस्तै नेपाल–भारत सीमामा पनि काँडेतार लगाउन माग गरेकी हुन् ।
‘खुला सीमानाका कारण दुईजना हतियारधारी भारतीय नम्बर प्लेटका सवारीमा नेपाल छिरेर कपिलवस्तुमा २ जनाको हत्या भएको छ । विगतमा पनि भारतीय सुरक्षाकर्मीद्वारा हाम्रो गोविन्द गौतमको हत्या भएको हो, जयसिंह तुइनको घाउ आलै छ,’ गुरुङले भनिन्, ‘आतंकवादी हत्याराहरू, मानव तस्कर र सीमा अतिक्रमण रोक्न अनिवार्य काँडेतार बार लगाउन नेपाल सरकारसँग जोडदार माग छ ।’
उनले आफ्नो घरमा विस्फोटक पदार्थ फालिँदा प्रहरीले पटका भनेर गम्भीर रूपमा नलिएको आरोप समेत लगाइन् ।
त्यस्तै, नेपाली कांग्रेसका केन्द्रीय सदस्य एवं सांसद जीपछिरिङ लामाले श्रीमान् र श्रीमती नै उम्मेदवार हुने व्यवस्था हटाउन माग गरेका छन् ।
श्रीमान्–श्रीमतीले उम्मेदवारी दिए एउटाको खारेज गर्ने गरी नियमावली संशोधन गर्न उनले निर्वाचन आयोगको ध्यानाकर्षण गराए ।
शुक्रवार बसेको प्रतिनिधि सभा बैठकको शुरूमै सभामुखसँग समय लिएर सांसद लामाले श्रीमान र श्रीमती उम्मेदवार बन्दा कार्यकर्ताले अवसर नपाएको बताए ।
‘श्रीमान्ले प्रत्यक्ष टिकट पाउँदा श्रीमतीलाई समानुपातिकमा राख्ने गरिएको छ । यसो गर्दा हरेक पार्टीको कार्यकर्ताले टिकट पाएका छैनन् । निर्वाचन आयागले नियमावली संशोधन गरेर श्रीमान श्रीमती उम्मेदवार भए एउटाको खारेज गर्ने नियमावली बनाउनुपर्छ ।’
कांग्रेस सभापति एवं प्रधानमन्त्री शेरबहादुर देउवा दम्पत्ती नै उम्मेदवार बन्न खोजिरहेका छन् । सांसद लामाले संसदको कार्यकाल सकिन लागेको भन्दै भारतसँग वार्ता गरेर लिपुलेकको जमिन फिर्ता गराउन पनि माग गरे ।
प्रतिनिधि सभा बैठकको शून्य समयमा कांग्रेस सांसद रंगमती शाहीले उम्मेदवारले शुरूमै सम्पत्ति विवरण सार्वजनिक गर्ने व्यवस्था गर्न सरकारको ध्यानाकर्षण गराइन् ।
