माओवादी केन्द्रका अध्यक्ष पुष्पकमल दाहाल प्रचण्डले चुनावपछि सडकमा जाने घोषणा गरेका छन् । निर्वाचन र शासन प्रणाली बदल्नुपर्ने भन्दै उनले आगामी चुनावपछि आफू सडकमा जाने बताएका हुन् ।
समाजवादको नेपाली मार्गचित्र विषयक कार्यक्रममा प्रचण्डले भने, ‘चुनावपछि यो प्रणाली बदल्न सडकमा जान्छु ।’
प्रचण्डले भने, ‘हेरिरहनु होला चुनावपछि म सडकमा जान्छु । समाजवादमा जाने जुन परिकल्पना मैले गरेको छु त्यसका लागि यो मेसिनरी बदल्न जरुरी छ । शासन प्रणाली र चुनाव प्रणाली बदल्न जनतामा जानुको विकल्प छैन र त्यो आन्दोलन हुनेछ । हेर्नुहोला त्यो कसरी हुन्छ । हामीबाहेक अरुले सक्दैनन्, अरुले गर्ने आन्दोलन त प्रतिगमन हो ।’
अध्यक्ष प्रचण्डले हालै संसदीय समितिमा चोलेन्दशमसेर जबराले आफू सडकबाट पनि घेराबन्दीमा परेको प्रसंग निकाल्दै त्यो घेराबन्दी आफूले नै गरेको दाबी गरे ।
उनले घनश्याम भुसालले तीन-चार वर्षभित्र उथलपुथल हुन्छ भनेपनि त्यो उथलपुथल १ वर्षभित्रै हुने र त्यसको नेतृत्व आफैंले गर्ने बताए ।
कार्यक्रममा बोल्दै नेता भुसालले एकपटक फेरि क्रमभंग गर्न प्रचण्डलाई आग्रह गरेका थिए ।भुसालले अहिलेको संविधान कम्युनिस्टहरुको भन्दै पार्टी एकता नभत्काएको र संसद विघटन नगरेको भए मुलुकका जस्तासुकै संकट सामना गर्न पार्टी सक्षम रहेको बताए ।
भुसालले भने– त्यो एकता नभत्काएका भए, संसद विघटन नभएको भए हामीसँग त्यो ताकत थियो । संसद विघटन गरेर यो दुनियाँका अगाडि बेइज्जत नगरेको भए यस्ता संकट थाम्ने नेपाली राजनीति बनेको थियो । यो चुनाव भन्दा अगाडि वाममोर्चा बनाउन सक्नुपर्थ्याे, यो ठूलो दुर्भाग्य हो । अहिले त समाजवाद ल्याउन संसद भंग गर्नुपर्छ, पार्टी भत्काउनुपर्छ भन्ने परेको छ।
भुसालले अहिले स्वतन्त्रहरुको लहरलाई नजरअन्दाज नगर्न भन्दै आफूले तीन चार वर्षभित्र ठूलो उथलपुथल ल्याउने देखिरहेको दाबी समेत गरे । त्यो उथलपुथलले अहिलेको गतिहीनता र नीतिहीनता तथा मनपरीतन्त्रलाई फाल्दा राम्रै हुने भुसालको तर्क छ ।
