काठमाडौं – काठमाडाैं महानगरपालिकाका मेयर बालेन्द्र शाहका मुख्य चुनावी रणनीतिकार गणेश कार्की रवि लामिछाने नेतृत्वको राष्ट्रिय स्वतन्त्र पार्टीमा प्रवेश गरेका छन् ।
उनीसँगै वातावरणविद् डा. अरनिको पाँडे र महिला उद्यमी सुमना श्रेष्ठलाई पनि प्रवेश गरेका छन् । स्वतन्त्र उम्मेदवारी दिने तयारीमा रहेका पाँडे दलमै आबद्ध हुने निर्णय गरेका हुन् । उनीसहित तीनै जना पार्टीका केन्द्रीय सदस्य बनेका हुन् ।
पाँडे प्रतिनिधिसभा सदस्यमा ललितपुर क्षेत्र नं. ३ बाट स्वतन्त्र उम्मेदवारी दिने घोषणा गरेर चुनावी तयारीमा जुटेका थिए । पार्टी अध्यक्ष लामिछानेले बिहीबार उनलाई केन्द्रीय समितिमा स्वागत गरिएको ट्वीटरमार्फत जानकारी दिएका छन् ।
पाँडे हिमालय क्षेको वायु प्रदूषण, जलवायु र दीगो विकासका विज्ञ समेत मानिन्छन् । गणेश कार्की काठमाडाैं महानगरपालिकाका मेयर बालेन्द्र शाहका मुख्य चुनावी रणनीतिकारमध्ये एक हुन् । उनले महानगरलाई आवश्यक सुझाव दिने र रणनीति बनाउने काममा भाग लिँदै आएका थिए ।
डा. अरनिको पाँडे, सुमना श्रेष्ठ र गणेश कार्की लाई केन्द्रिय समितिमा स्वागत छ। pic.twitter.com/DIVk28D35j
— Rabi Lamichhane (@hamrorabi) September 8, 2022
सञ्चारकर्म छाडेर राजनीतिमा लागेका रवि लामिछाने कुन ठाउँबाट चुनाव लड्लान् भन्ने चासो सबैलाई छ । तर राष्ट्रिय स्वतन्त्र पार्टी घोषणा गरे पनि उनले आफूले कुन निर्वाचन क्षेत्रबाट चुनाव लड्ने भनेर स्पष्ट खुलाएनन् ।
‘मलाई निर्वाचन क्षेत्रका बारेमा पनि प्रश्न आइरहन्छ,’ उनले भने, ‘तपाईँ कुन निर्वाचन क्षेत्रबाट कहाँबाट उठ्नुहुन्छ भन्ने प्रश्न आउँछ ।’
आफूलाई झापा, डडेलधुरा, चितवनबाट चुनाव लड्न मन भएको र त्यहाँबाट चुनाव लड्न नडराएको तर सरकारमा को छन् र उनीहरुले विगतमा गरेको चुनाव हेरेर आफू सचेत रहेको लामिछानेले बताए ।
यस्तै, लामिछाने नेतृत्वको राष्ट्रिय स्वतन्त्र पार्टी आगामी प्रदेशसभा निर्वाचनमा सहभागी नहुने जनाइसकेको छ । नागरिकको आवाज सुनेपछि पार्टीले प्रदेशसभा निर्वाचनमा सहभागी नहुने निर्णय लिएको थियो ।
खर्चिलो संरचना बनाएर राज्यको ढुकुटी सक्नुभन्दा सुधारेर जानु आवश्यक भएको भन्दै प्रदेशसभामा सहभागी नुहँदा मुलुकको खर्च जोगिने कारणले सो निर्णय गरेको उनले बताएका छन्।
