चिनियाँ राष्ट्रिय जनकंग्रेसका अध्यक्ष ली चान्स काठमाडौं आइपुगेका छन्। बिहीबार बिहान फर्किनेगरी नेपाल आएका उनले यहाँ राष्ट्रपति, प्रधानमन्त्री, प्रतिनिधिसभाका सभामुख र राष्ट्रिय सभाका अध्यक्ष अनि परराष्ट्रमन्त्रीसँग सिष्टाचार भेट गर्नेछन्।
चिनियाँ विशेष विमानबाट ६७ जनाको प्रतिनिधिमण्डलको नेतृत्व गर्दै भ्रमणमा आएका लीलाई सभामुख सापकोटा, राष्ट्रियसभाका अध्यक्ष गणेश तिमल्सिना र परराष्ट्र मन्त्रालयका अधिकारीहरूले स्वागत गरेका छन् । उनी विमानस्थलबाट सिधै उनको बस्ने व्यवस्था गरिएको होटल सोल्टी गएका छन् ।
कार्यसूचीअनुसार उनले सोमबार काठमाडौं उत्रिएको केहीबेरमा सभामुख सापकोटासँग द्विपक्षीय भेटघाट हुने कार्यक्रम छ । परराष्ट्र स्रोतका अनुसार द्विपक्षीय भेटघाटका क्रममा दुई देशबीच संसदीय तहमा सहकार्य गर्ने विषयमा हस्ताक्षरसमेत हुनेछ।
भेटमा सबै दलका प्रमुख सचेतक, सचेतक र नेपाल–चीनमैत्री संसदीय समूहको टोलीका सदस्यसमेत रहने सभामुखको सचिवालयले जनाएको छ । भेटपछि सभामुख सापकोटाले समकक्षी लीका लागि उनी बसेकै होटल सोल्टीमा रात्रिभोजको आयोजना गरेका छन् ।
त्यस्तै उनले नेकपा माओवादी केन्द्रका अध्यक्ष र नेकपा एमालेका अध्यक्षसँग पनि भेटवार्ता गर्ने कार्यक्रम छ। उनी संसद भवन पनि जानेछन्। नेपाल-चीनमैत्री संसदीय समूहको टोलीसँगै संसद भएर गएर उनले सबै दलका संसदीय दलका नेताहरूसँग भेटवार्ता गर्ने कार्यक्रम छ।
६ जना मन्त्रीसहितको उच्चस्तरीय टोली लिएर आउन लागेका लीको यो भ्रमण चिनियाँ राष्ट्रपति सी जिनफिङपछि नेपालमा उच्च चिनियाँ भ्रमण हो। उनी सीका विश्वासपात्र पनि हुन्।
मंसिर ४ गते हुन गइरहेको प्रतिनिधिसभा र प्रदेशसभा निर्वाचनको पूर्वसन्ध्यामा भएको यो उच्चस्तरीय चिनियाँ भ्रमणलाई रणनीतिक रूपमा पनि हेरिएको छ। यो भ्रमण खासगरी नेपालको संघीय संसद र चिनियाँ जनकंग्रेसबीच सहकार्यका लागि छलफलमा केन्द्रित हुने बताइएको छ।
