काठमाडौं – काठमाडौं महानगरपालिकाले १ सय ६२ जना नगर प्रहरी थप्ने भएको छ । महानगरपालिकाले टेण्डर आह्वान गरेर करारमा नगर प्रहरी थप्न लागेको नगर प्रहरी उपरीक्षक दिनेश अर्यालले जानकारी दिए ।
अर्यालका अनुसार निजी सेक्युरिटी कम्पनीहरु मार्फत पुर्व सेना, प्रहरी, प्रहरीका तालिम लिएकाहरुलाई छनौट गर्ने गरी टेण्डर समेत आह्वान भईसकेको छ ।
यसअघि काठमाडौं महानगरका मेयर बालेन्द्र साह(बालेन)ले राष्ट्रिय सभा गृहमा नगरप्रहरीहरुलाई नेपाल प्रहरीको भन्दा अब्बल काम गरेर देखाउन निर्देशन दिएका थिए ।
नगरप्रहरीलाई नेपाल प्रहरी भन्दा फरक दृष्टिकोणले हेर्ने गरेको भन्दै शारिरीक रुपमा फिटनेस, आर्थिक पारदर्शिता र प्रभावशाली व्यक्तित्व बनाउन निर्देशन दिएको एक नगर प्रहरी अधिकृतले बताए । महानगरले अहिले १ सय ७३ नगर प्रहरी कार्यरत रहेको जनाएको छ ।
त्यस्तै, मेयर शाहले नगर प्रहरीलाई गलत काम नगर्न निर्देशन दिएका छन् । आज साेमवार भएकाे एक कार्यक्रममा उनले यस्ताे निर्देशन दिएका हुन् ।
मेयर शाहले विगतमा भएका कमजाेरीलाई सच्याउँदै इमानदारिताका साथ काम गर्न पनि नगर प्रहरीलाई आग्रह गरे । उनले भने , ‘गल्ती भएका कुरालाई सच्याउँदै अघि बढ्नुपर्छ । गलत काम गरेर, पैसा आर्जन गरेर मान्छेलाई कहिल्यै सुख हुँदैन भन्ने तपाईँहरूले देखी नै सक्नुभएकाे छ । हामी धर्म र पापमा विश्वास गर्छाैँ । गलत गरेर कमाएकाे धन, पाप धुरीबाट कराउँछ भनेजस्तै याे कुरालाई मनन गरेर आफ्ना आचरण सुधार गर्नुस् ।’
यस्तै मेयर साहले नगर प्रहरीलाई शारीरिक अभ्यास गराउनुपर्ने पनि बताए । उनले प्रहरी संस्था सबै समान भएकाे बताउँदै नगर प्रहरीलाई पनि त्यसैअनुसारकाे बनाउने बताए ।
आफ्नो छोटो सम्बोधनमा बालेनले नेपाल प्रहरीबाट केही जनशक्ति नगरप्रहरीमा थप्न खोजिएकोमा सफल नभएको बताए ।
‘हामीले नेपाल प्रहरीबाट ल्याउन खोज्दा नगर प्रहरीभन्दा हामी माथि हौं भन्ने भावना देखियो’, उनले भने, ‘तपाईंहरुले आगामी दिनमा फिटनेसदेखि विभिन्न पक्षहरुमा सुधार ल्याएर आफ्नो सवलीकरणमा लाग्नुस् । यसका लागि आवश्यक सहयोग महानगरले गर्न तयार छ ।’ साहले अनुशासनमा रहेर काम गर्न नगरप्रहरीलाई आग्रह गरे ।