क्यानडाविरुद्ध जारी तेस्रो ओडीआई खेलमा नेपालले ५ पेनाल्टी रन प्राप्त गरेको छ ।
क्यानडाले पहिलो ब्याटिङ गर्दै ८ विकेटको क्षतिमा २ सय ३२ रन जोडेको थियो । लक्ष्य पछ्याउन आएको नेपालले इनिङ सुरु नहुँदै ५ रन प्राप्त गरेको हो । पहिलो इनिङमा क्यानडाले ब्याटिङ गर्दा भएको गल्तीका कारण नेपालले ५ रन पाएको हो ।
क्यानडाको इनिङमा ४९ औं ओभरको अन्तिम बलमा कप्तान साद बिन जफरले पिचको बीच भागबाट कुदेर रन जोडेपछि नेपालले आफ्नो इनिङमा ५ रन प्राप्त गरेको हो । त्यसअघि पनि सादले चेतावनी पाएका थिए । नियम अनुसार पिचको बीच भागमा (खतरा क्षेत्र) कुद्दा अम्पायरले चेतावनी दिएर पुन: दोहोर्याए विपक्षी टोलीलाई पेनाल्टी रन दिन पाउने प्रावधान छ ।
नेपालले इनिङमा राम्रो सुरुवात गर्दै ७ ओभरमा १ विकेट गुमाएर ५५ रन जोडेको छ ।
