काठमाडौं – नेपाल र दक्षिण कोरियाका १० पर्वतारोही जुगल हिमाल आरोहण गर्न शनिबार त्यसतर्फ प्रस्थान गर्ने भएका छन् । नेपाल पर्वतारोहण संघ, पर्यटन बोर्ड र सिन्धुपाल्चोकको जुगल गाउँपालिकाले शुक्रबार काठमाडौंमा संयुक्त रूपमा पत्रकार सम्मेलन गर्दै चैत्र २४ गते शनिबारबाट जुगल हिमाल १ र २ को पहिलो आरोहणका लागि त्यसतर्फ प्रस्थान गर्ने जनाएको हो ।
नेपालका तीन र दक्षिण कोरियाका सात पर्वतारोहीले आरोहण गर्न लागेका हुन् । नेपाल सरकारले गत वर्ष मात्रै आरोहण खुला गरेको ६,५९१ मिटर उचाइको जुगल–१ र ६,५१८ मिटर अग्लो जुगल–२ चढ्न लागेका हुन् ।
आरोहणका लागि आज साँझ १० कोरियाली आरोही नेपाल आइपुग्ने भएका छन् भने नेपाली आरोही भने काठमाडौं आइसकेका छन् । विश्व कीर्तिमानधारी नेपाली महिला आरोही तथा एनएमएका दोस्रो उपाध्यक्ष सुश्री दावा याङ्जुम शेर्पाको नेतृत्वमा तीन नेपाली आरोहीसहित प्रख्यात आरोही तथा नेपालका मानार्थ नागरिक श्री उम होङ गिलको नेतृत्वमा १० कोरियाली पर्वतारोही रहेका छन् । यो आइतवारबाट जुगल-१ र २ को साहसिक यात्रामा लागेका छन्।
सम्माननीय प्रधानमन्त्री पुष्पकमल दाहालले भोलि बिहान आफ्नो निवास बालुवाटारस्थित कार्यालयमा यात्रु टोलीलाई नेपाली झण्डा हस्तान्तरण गर्ने कार्यक्रम छ । सम्माननीय प्रधानमन्त्रीबाट शुभकामना लिएर टोली सिन्धुपाल्चोक जिल्लाको जुगल गाउँपालिका तर्फ प्रस्थान गर्ने छ ।
नेपालको हिमाली पर्यटनको संरक्षण र प्रवद्र्धनमा समर्पित देशको एकमात्र अल्पाइन सङ्घका रूपमा यस अभियानले नेपालको हिमाली पर्यटनको थप विकासका लागि मार्ग प्रशस्त गर्ने विश्वास एनएमएको छ । ‘दक्षिण कोरिया पर्वतारोहणका लागि उत्कृष्ट बजार भएकोले सो पदयात्रा कोरियामा पनि टेलिभिजनमा प्रशारण गरिने छ’, वरिष्ठ उपाध्यक्ष ठाकुरराज पाण्डेले भने । “त्यसैले यस अभियानलाई राष्ट्रिय र अन्तर्राष्ट्रिय रूपमा बजारमा ल्याइनेछ। यसले नेपाललाई थप पर्यटकहरू आकर्षित गर्न पक्कै मद्दत गर्नेछ।”
उक्त टोली भ्रमण पूरा गरी २५ अप्रिल २०२४ (१३ वैशाख २०८१) मा काठमाडौं फर्कने अपेक्षा गरिएको छ ।
सरकारले यस अभियानका १० सदस्यको रोयल्टी मिनाहा गरेको छ । मन्त्रिपरिषद्को पछिल्लो बैठकमा सरकारले ७ कोरियाली र ३ नेपाली आरोहीको रोयल्टी शुल्क मिनाहा गर्ने निर्णय गरेको थियो । नेपाल–कोरियाली द्विपक्षीय सम्बन्ध स्थापनाको ५०औँ वार्षिकोत्सवका अवसरमा यो अभियान मनाइँदैछ ।
पर्यटन, संस्कृति तथा नागरिक उड्डयन मन्त्रालय, एनएमए, नेपाल पर्यटन बोर्ड, कोरिया अल्पाइन महासंघ, उम होङ गिल ह्युमन फाउण्डेसन र जुगल गाउँपालिकाले संयुक्त रुपमा उक्त पदयात्राको आयोजना गरेका हुन् ।
