काठमाडौं- काठमाडौं महानगरपालिका २२ नम्बरका वडाध्यक्ष चिनीकाजी महर्जन मेयर बालेन्द्र साहले फरक मत र विचारलाई निषेध गर्न खोजेको बताएका छन् ।
सोमबार बसेको नगर सभाको १५ औं अधिवेशनको तेस्रो बैठकमा बोल्ने क्रममा महर्जनले फरक मत राखेकै कारण मेयर साहका समर्थकहरूले आफूमाथि बारम्बार आक्रमण गरेको बताएका छन् ।
‘यहाँ मेरा सिनियर दाइहरू तीनजनाले बोलिसक्नु भएको छ। हामीले यी दुई वर्षमा केही कुरामा सफल भयौँ, केहीमा असफल भयौँ । नराम्रा कामहरूबाट सिक्नुपर्छ, गल्तीलाई गुरु मानेर हिँड्नुपर्छ’, उनले भने, ‘बजेट खर्चको अनुपात दु:ख लाग्दो छ, अहिलेसम्म ३० प्रतिशत मात्रै खर्च भएको छ। अरु महानगर र पालिकाको तुलना गर्दा हाम्रो अवस्था अति नै कमजोर छ ।’
बजेट खर्चको दुरावस्थाबारे अब मूल्यांकन र समीक्षा चाहिने पनि उनले बताए । ‘महानगरको नेतृत्व समान सहभागिता र संवादको कुरामा चुकेको छ। छलफलमा चुकेको छ । सहभागितामुलक र संवाद र छलफलहरूबाट मात्रै हामी गन्तव्यमा पुग्छौँ’, उनले भने, ‘कसैले पनि द्वन्द्वबाट जित्ने प्रयासले सफल होइँदैन ।’
उनले आफू एमालेको सदस्य भएको बताए । ‘मेरो गौरवमय पार्टी नेकपा एमालेको सदस्य हुँ म । विगतमा सामाजिक अभियानबाट म राजनीतिमा जोडिएँ । राजनीतिक आन्दोलनमा लाग्नुअघि २०४२ सालमा न्युह:दया भिन्तुनाको जुलुसमा जाँदा लाठी खाएँ, त्यसपछि म निरन्तर निरंकुशताविरुद्ध लडिरहेको छु’, उनले भने, ‘म यही माटोमा हुर्केको मान्छे हो । मेरै माटोमा नयाँ वर्षको शुभकामना कार्यक्रममा जाँदा लाठी खानु राम्रो होइन । त्यसबेला वाक स्वतन्त्र थिएन, बोल्न पाइँदैनथ्यो, त्यही व्यवस्थाको विरोध गर्दै म यहाँसम्म आएँ ।’
तर अहिले काठमाडौं महानगरको नेतृत्वलले फरक मतलाई दबाएर निषेध गर्न खोजेको उनले बताए । ‘फरक मतलाई अझै पनि दबाइन्छ भने अझै पनि म मुर्दावाद भन्छु । फरक मतलाई सम्मान गर्ने ‘मेरिट अफ डेमोक्रेसी’ हामीलाई चाहिएको छ । फरक मतसँग संवाद गर्ने क्रम हाम्रो संस्थामा बन्द भएको छ’, उनले भने, ‘फरक मतलाई सम्मान गरे राम्रो हुन्छ । एक्लै होइन, मिलेर जाऊँ । १ र १ बराबर २ होइन, १ र १ बराबर ११ गरेर जानुपर्छ ।’
उनले मेयर बालेन्द्र साहले अरुको बोल्ने अधिकार खोसेको पनि बताए । ‘बोल्ने अधिकार खोसियो कि दबाइयो भन्ने कुरा जुन छ । १६० जनाले १६० थरी कुरा भन्नुभन्दा छलफल गरेर एकैजनाले बोलिदिने अभ्यास पहिलेदेखि थियो’, उनले भने, ‘त्यो अभ्यास गरिरहँदा साथीहरूलाई आक्षेप लगाइयो । मेरा अग्रजलाई आक्षेप लगाइयो, यसमा सचेत हुनु जरूरी छ ।’
उनले आफू वाक स्वतन्त्रलाई माया गर्ने मान्छे भएको बताउँदै फरक विचार नदबाउन मेयर साहलाई आग्रह गरे । ‘फरक कुरालाई, मतलाई, विचारलाई नदबाइयोस् सम्मान गर्न सिक्नुस्’, उनले भने, ‘अबदेखि विरोधका कुरालाई पनि सम्मान गरियोस् ।’
