नेकपा एकीकृत समाजवादीले केही पदाधिकारीको संख्या थप गर्ने निर्णय गरेको छ। बिहीबार पार्टी केन्द्रीय कार्यालय आलोकनगरमा बसेको पार्टीको सचिवालय बैठकले वरिष्ठ उपाध्यक्षसहित केही पदाधिकारीको संख्या थप गर्ने निर्णय गरेको हो।
पार्टी उपमहासचिव एवं प्रवक्ता जगन्नाथ खतिवडाका अनुसार, केन्द्रीय पदाधिकारीको संख्या २१ रहनेछ।
त्यस्तै, केन्द्रीय कमिटीमा पनि १ सय जनाको संख्या थप गर्ने निर्णय भएको उनले बताए। यसअघि पार्टीको केन्द्रीय परिषद् बैठकबाट १ सय ९९ जनाको केन्द्रीय कमिटी रहने निर्णय भएको थियो।
अब त्यसलाई बढाएर २ सय ९९ जना बनाउने निर्णय भएको खतिवडाले जानकारी दिए।
‘केन्द्रीय कमिटीको संख्या २ सय ९९ जनाको हुनेछ। पहिला केन्द्रीय परिषद्बाट १ सय ९९ जनाको नाम पारित गरेका थियौँ,’ उनले भने, ‘केन्द्रीय पदाधिकारीको संख्या २१ जनाको हुनेछ।’
केन्द्रीय उपाध्यक्षमा एउटा महिलाको सिट सुरक्षित गरिने पनि निर्णय भएको उनले बताए। त्यस्तै, आवश्यक्ता अनुसार वरिष्ठ नेताको पद सिर्जना गर्न सकिने पार्टीको नीति छ।
पार्टीले सम्मानित नेताको पद कायमै राख्ने निर्णय पनि गरेको छ। अहिले पार्टीको सम्मानित नेताको रुपमा झलनाथ खनाल रहेका छन्।
यसअघि महाधिवेशनका लागि ५ प्रतिशत प्रतिनिधि मनोनीत गर्ने व्यवस्था भए पनि अहिले त्यो व्यवस्था हटाइएको उनले बताए।
‘केन्द्रीय प्रतिनिधिहरूलाई महाधिवेशन प्रतिनिधि ५ प्रतिशत मनोनीत गर्ने व्यवस्था थियो। त्यो मनोनीत नगर्ने भन्ने निर्णय गरिएको छ,’ खतिवडाले भने।
आगामी असार १५ गते वृहत विवरणबारे पत्रकार सम्मेलन गरेर जानकारी गराइने उनले बताए।
