धरमपानी गुरुङ्ग समुदायको बसोबासले भरिएको पहाडको काखमा अवस्थित सुन्दर गाँउ हो। जुन तनहुँ जिल्लाको दक्षिण तर्फ बन्दिपुर गाँउपालीकामा पर्दछ ।
बन्दिपुर बजारबाट लगभग १ घन्टाको मोटर यात्रापछि सजिलै धरमपानी गाँउ पुग्न सकिन्छ । गाँउको विकास साथै कला सँस्कृति प्रवर्द्धन र आयमा बढाउने उद्देश्यले धरमपानी घरबास संचालनमा आएको छ ।
गाँउमा पाइला राख्ने बित्तिकै आमा समुहको स्वागत सत्कार साथै लहरै देखिने ढुङ्गा काठहरूबाट बनेका कलात्मक पुरना घरहरूले मन लोभ्याउनेछ ।
यँहा आउने पाहूनाहरूले गाँउमा उत्पादन भएको अर्गानीका खानपानको अनुभव गर्न सक्नेछन् । यहाँको बसाईमा हामीले नजिकबाट गुरुङ्ग समुदायको कला सँस्कृति दैनिक जीवनयापन रहनसहनलाई नजिकबाट नियाल्न सक्ने छौँ । धरमपानी घरबासमा पाहुनालाई गरिने न्यानो आतिथ्य स्वागत सत्कार गुरुङ्ग समुदायको कला सँस्कृतिले फेरि-फेरि जान मन लाग्ने अनुभुत गराउँछ।
शहरको दैनिकी भिडभाड कोलाहलबाट केही समय विश्राम लिन चाहनु हुन्छ भने धरमपानी होमस्टे एउटा राम्रो गन्तव्य हुनसक्छ ।
