काठमाडौं – राष्ट्रिय फोटो पत्रकार समूह (एनएफपीजे) नेपालले हिमालसम्बन्धी फोटो प्रदर्शनीको आयोजना गर्ने भएको छ । एनएफपीजेले विश्व फोटोग्राफी दिवसको अवसरमा आगामी भदौ ३ गते ललितपुरस्थित पाटन दरबार परिसरमा फोटो प्रदर्शनी आयोजना गर्न लागिएको हो ।
जलवायु परिवर्तनका कारण हिमाल पग्लिँदै गएपछि हिमाल बचाऊ अभियानलाई सार्थकता दिन र देशमा आन्तरिक तथा बाह्य पर्यटकलाई आकर्षण गराउन प्रदर्शनी आयोजना गर्न लागिएको आयोजकले जनाएको छ ।
एनएफपीजेले प्रदर्शनीका लागि हिमालसँग सम्बन्धित फोटो पठाउन फोटो पत्रकार तथा फोटोग्राफरहरूलाई अनुरोध गरेको छ । प्रदर्शनीका लागि यही साउन २९ गतेभित्र संस्थाको इमेलमा फोटो पठाइसक्नुपर्ने आयोजकले जनाएको छ ।
एनएफपीजे देशैभरि क्रियाशील रहेका फोटो पत्रकारहरूको संगठनको हो । यो संस्था २७ वर्षदेखि क्रियाशील छ ।
