प्रतिनिधि सभा सदस्य एकनाथ ढकालले दक्षिण एसियाली क्षेत्रीय सहयोग संगठन (सार्क) लाइ क्रियाशील बनाउन संसदले भूमिका खेल्नु पर्ने र सो को लागि सार्क क्षेत्रका सभामुख हरुको शिखर सम्मेलन आयोजना गर्न सरकारको ध्यानाकर्षण गराएका छन् ।
बिहिबार संसदमा बोल्दै सांसद ढकालले सार्क सन् १९८५ मा स्थापना भएयता काठमाडौँमा १९८७, २००२ र २०१४ मा गरि तिन पटक सफलताका साथ् शिखर सम्मेलन सम्पन्न भएको तर सन् २०१४ देखि नेपाल सार्कको अध्यक्ष भएपनि यसको शिखर सम्मेलन हुन नसकेको बताए।
पूर्व मन्त्री समेत रहेका ढकालले दक्षिण एसियाली क्षेत्रको आर्थिक वृद्धि, समाजिक प्रगति तथा सांस्कृतिक विकासमा तीब्रता ल्याउनु र सबै मानिसलाई स्वाभिमानसाथ रहने र उनीहरूलाई आफ्नो पूर्ण क्षमताको महसुस गराउने अवसर प्रदान गर्नु सार्कको बडापत्रमा उल्लेख रहेको बताए ।
ढकालले सार्क नेपाल र दक्षिण एसियाली क्षेत्रको हितमा रहेको तर यो निष्क्रिय हुँदा यस क्षेत्रका समान चुनैतीको सामना गर्न जटिलता सृजना भएको र अवसरहरु ओजेलमा परेको बताए ।
सांसद ढकालले सार्कलाई क्रियाशील बनाउँन नेपालले सबै क्षेत्रवाट नेतृत्वदायी भूमिका खेल्नु पर्ने र आगामी संयुक्त राष्ट्र संघको महासभामा कम्तिमा सार्क मन्त्रीस्तरिय साइड लाइन बैठक नेपालले आयोजना गरोस भन्ने चाहेको बताए ।
