काठमाडौं – नेपाली सेनाले बुधबार २६२औँ स्थापना दिवस तथा महाशिवरात्रि पर्व विशेष समारोहका साथ मनाएको छ। सैनिक मञ्च, टुँडिखेलमा आयोजित कार्यक्रममा युद्धकला प्रदर्शन, शिवरात्रि परेड, तोप बढाईं, कवाज तथा आतसबाजी प्रदर्शन गरिएको थियो।
सो अवसरमा राष्ट्रपति रामचन्द्र पौडेल, उपराष्ट्रपति रामसहायप्रसाद यादव, प्रधानमन्त्री केपी शर्मा ओली, सरकारका मन्त्रीहरू तथा उच्च पदस्थ व्यक्तिहरूको उपस्थिति रहेको थियो। समारोहमा नेपाली सेनाले विशेष कला प्रदर्शनीसमेत गरेको थियो।
राष्ट्रपति पौडेलले सैनिक मञ्चस्थित सैनिक स्मारकमा पुष्पहार अर्पण गर्दै सेनाको योगदानप्रति सम्मान व्यक्त गरे। समारोहको दौरान हेलिकोप्टरबाट राष्ट्रिय झण्डासहित सेना दिवसको ब्यानर प्रदर्शनी तथा पुष्पवृष्टि गरिएको थियो।
सेना दिवसका अवसरमा सैनिक मञ्चमा परेड (शस्त्राभ्यास) तथा तोप बढाइँ, कवाजलगायत विविध सैनिक कला र सांस्कृतिक कार्यक्रम सञ्चालन भएका थिए। नेपाली सेनाका विभिन्न पृतना, बाहिनी, गण, गुल्मलगायत निकायहरूमा पनि विविध कार्यक्रमको आयोजना गरिएको थियो।
नेपाली सेनाले आफ्नो स्थापना दिवसलाई विशेष बनाउने क्रममा विभिन्न सामाजिक कार्य, जनचेतना कार्यक्रम तथा परोपकारी गतिविधिहरू पनि सञ्चालन गरिरहेको छ। सेनाले राष्ट्रिय सुरक्षा, शान्ति तथा विपद् व्यवस्थापनमा खेलेको भूमिकालाई सम्मान गर्दै यो दिवस मनाइएको हो।
