भक्तपुर — मध्यपुर थिमि–७ स्थित नगदेशमा १२ वर्षपछि ऐतिहासिक तान्त्रिक भैरव नाच प्रदर्शन गरिएको छ। करिब दुई हप्तासम्म तान्त्रिक विधिबाट विशेष प्रशिक्षणपछि गाईजात्राको भोलिपल्टबाट सुरु भएको नाच चार दिनसम्म राति–राति विभिन्न टोलमा प्रदर्शनी गरिएको हो।
नगदेशको सांस्कृतिक र धार्मिक परम्परासँग जोडिएको यस भैरव नाच लाछि, वहाननी, झ्वापुननी, छ्वास, त्वागा, ध्वाकासी, कुम्हालाछि, न्यागाचा, पुखुसीलगायतका टोलमा प्रदर्शित गरिएको थियो। स्थानीय बासिन्दा र भक्तजनको ठूलो सहभागिता रहेको यस नाचमा भैरवको तान्त्रिक स्वरूप, परम्परागत वेशभूषा र धार्मिक विधि अनुसारको नृत्य प्रस्तुत गरियो।
स्थानीयको भनाइ अनुसार, भैरव नाच १२ वर्षपछि देख्न पाउनु समुदायका लागि गर्व र आनन्दको विषय भएको छ। यसले पुरानो सांस्कृतिक सम्पदा पुनर्जीवित गर्न सहयोग पुग्ने विश्वास गरिएको छ।
