काठमाडौं – नेपाल प्राकृतिक सम्पदा र भौगोलिक विविधताले भरिएको देश हो। हिमाल, पहाड, वनजंगल, नदी तथा उच्च हिमाली मैदानहरूले यहाँको पर्यटनलाई विश्वभर चिनाएको छ। यिनै अनुपम प्राकृतिक गन्तव्यमध्ये बागलुङ, म्याग्दी र रुकुमको संगम क्षेत्रमा अवस्थित ढोरपाटन र बुकीपाटन पछिल्ला वर्षहरूमा पर्यटकको आकर्षणको केन्द्र बन्दै गएका छन्।
समुद्री सतहबाट करिब २,८५० मिटरदेखि ५,५०० मिटर उचाइसम्म फैलिएको ढोरपाटन क्षेत्र नेपालकै एक मात्र शिकार आरक्ष को रूपमा परिचित छ। धौलागिरी हिमशृङ्खलाको दक्षिण–पश्चिमी फेदीमा रहेको यो क्षेत्र प्राकृतिक सौन्दर्य, जैविक विविधता र सांस्कृतिक जीवनशैलीको अद्भुत संगम हो।
ढोरपाटन उपत्यका तथा जालजला–फागुने धुरी क्षेत्रबाट संसारको सातौँ अग्लो हिमाल धौलागिरी प्रथम (८,१६७ मिटर) सहित धौलागिरीका अन्य हिमशिखर, गुर्जा हिमाल, चुरेन हिमाल तथा पुथा हिमचुलीको आकर्षक दृश्य अवलोकन गर्न सकिन्छ।हिउँद याममा सेताम्मे हिमपातले ढाकिने ढोरपाटन क्षेत्र कुनै स्वर्गीय भूमिभन्दा कम देखिँदैन। यही दृश्यले हरेक वर्ष हजारौँ पर्यटकलाई यहाँसम्म आकर्षित गर्दै आएको छ।
ढोरपाटन उपत्यकाबाट करिब ३–४ घण्टाको पदयात्रापछि पुगिने बुकीपाटन विशाल अल्पाइन मैदान हो। समुद्री सतहबाट ३,०००–४,५०० मिटर उचाइमा फैलिएको यो क्षेत्र हरियो बुकी घाँसले ढाकिएको छ।
वसन्तमा रातो–सेतो गुराँसले सजिने र मनसुनसँगै विभिन्न रङका जंगली फूलहरूले भरिने बुकीपाटनलाई धेरैले ‘फूलहरूको स्वर्ग’ भनेर चिन्ने गरेका छन्।
ढोरपाटन शिकार आरक्ष दुर्लभ वन्यजन्तुको महत्वपूर्ण बासस्थान हो। यहाँ नाउर, झारल, मृग तथा डाँफे–मुनालजस्ता हिमाली चराचुरुङ्गी पाइन्छन्।जेठ–असार लागेसँगै स्थानीय मगर समुदायका गोठालाहरू भेडा, च्याङ्ग्रा र गाईवस्तु लिएर माथिल्ला पाटनतर्फ उक्लिन्छन्। उनीहरूको परम्परागत जीवनशैलीले हिमाली संस्कृतिलाई जीवन्त बनाएको छ।
ढोरपाटनमा स्थानीय होटल तथा सामुदायिक होमस्टे उपलब्ध छन्। ढिँडो, आलुका परिकार, सिस्नु, गुन्द्रुक तथा स्थानीय परिकारहरूले यात्रालाई अझ स्मरणीय बनाउँछन्। मध्यपहाडी लोकमार्ग विस्तारसँगै अहिले ढोरपाटन पुग्न सहज बनेको छ। बुर्तिबाङ हुँदै मोटरसाइकल, निजी तथा सार्वजनिक सवारीमार्फत यात्रा गर्न सकिन्छ। विभिन्न ट्राभल कम्पनीहरूले प्याकेज कार्यक्रम सञ्चालन गर्न थालेपछि यहाँ पर्यटकको चहलपहल उल्लेखनीय रूपमा बढेको छ।
हिमाल, फूलले ढाकिएका मैदान, दुर्लभ वन्यजन्तु, गोठालो संस्कृति र साहसिक पदयात्राको अनुभव एकै ठाउँमा लिन चाहनेका लागि ढोरपाटन र बुकीपाटन नेपालको उत्कृष्ट प्राकृतिक गन्तव्य का रूपमा स्थापित हुँदै गएका छन्। यहाँको यात्रा केवल भ्रमण होइन, प्रकृति र संस्कृतिसँगको अविस्मरणीय भेट हो। पछिल्ला दुई वर्षयता प्रभु एडभेन्चर ट्राभल एण्ड टुर प्रा. लि. तथा अन्य विभिन्न ट्राभल एजेन्सी तथा टुर कम्पनीहरूले प्याकेज कार्यक्रम सञ्चालन गर्न थालेपछि यहाँ पर्यटकको चहलपहल उल्लेखनीय रूपमा बढेको छ।
