काभ्रे – काभ्रेपलाञ्चोकको पनौती क्षेत्रमा यतिबेला किसानहरू धान गोडमेलमा व्यस्त छन्। धानबाली राम्रोसँग हुर्कियोस् र उत्पादन बढोस् भन्ने उद्देश्यले खेतमा उम्रिएको झार उखेल्ने तथा गोडमेल गर्ने काम तीव्र रूपमा भइरहेको छ।
विशेषगरी महिला किसानहरू धान खेतमा झार उखेल्दै गोडमेलमा सक्रिय देखिएका छन्। असारमा रोपिएको धान अहिले बढ्ने चरणमा रहेकाले समयमै गोडमेल गर्नु आवश्यक हुने किसानहरू बताउँछन्। गोडमेल गर्दा झारपात हट्नुका साथै धानको बोटले पर्याप्त पोषण पाउने भएकाले उत्पादनमा सकारात्मक प्रभाव पर्ने विश्वास गरिएको छ।
मनसुन सक्रिय भएसँगै खेतमा पर्याप्त पानी रहेकाले किसानहरू बिहानदेखि बेलुकासम्म खेतमै व्यस्त रहने गरेका छन्। पनौतीसहित काभ्रेका विभिन्न स्थानमा अहिले धान गोडमेलको चटारो चलेको छ।
तस्वीरहरू : नेपाल फोटो सर्भिस
