रसुवा – सडकको एकछेउ त्रिशूली नदी आफ्नै वेगमा सुसाइरहेको छ । अर्कोपट्टि अग्लो भीरबाट कलकल गर्दै झरेको पानी, वरिपरिको हरियाली र शीतल वातावरणले रसुवाको भाङ्गे झरना पछिल्लो समय आन्तरिक तथा बाह्य पर्यटकको आकर्षणको केन्द्र बन्दै गएको छ ।
रसुवाको उत्तरगया गाउँपालिका–२ डाँडागाउँस्थित बेत्रावती–मैलुङ–स्याफ्रुबेँसी सडकखण्डसँगै रहेको भाङ्गे झरना सडकबाटै सहज रूपमा अवलोकन गर्न सकिने भएकाले पर्यटकको रोजाइमा पर्न थालेको हो । करिब १८१ मिटर अग्लो भीरबाट खस्ने झरनाको मनमोहक दृश्य हेर्न नुवाकोट, काठमाडौं, धादिङलगायत विभिन्न जिल्लाबाट पर्यटक पुग्ने गरेका छन् ।
काठमाडौंबाट करिब ७२ किलोमिटरको दूरीमा रहेको यो झरना माथिल्लो त्रिशूली–३ ‘बी’ जलविद्युत् आयोजनानजिकै पर्छ। स्थानीयवासी सबिन सापकोटाका अनुसार बिदाको दिन झरना अवलोकन गर्न आउने पर्यटकको संख्या करिब एक हजारसम्म पुग्ने गरेको छ ।
सामाजिक सञ्जालमा झरनाका तस्बिर तथा भिडियो भाइरल हुन थालेपछि यसको चर्चा झनै बढेको सापकोटा बताउनुहुन्छ। उहाँका अनुसार झरनाको आकर्षणसँगै डाँडागाउँको पर्यटन सम्भावना पनि विस्तार हुँदै गएको छ ।
झरना अवलोकन गर्न आउने पर्यटकमध्ये कोही परिवारसहित रमाउने गरेका छन् भने कोही प्राकृतिक सौन्दर्यलाई क्यामेरामा कैद गर्न व्यस्त देखिन्छन्। युवापुस्ता भने टिकटक तथा अन्य सामाजिक सञ्जालका लागि भिडियो र तस्बिर बनाउन झरनामा पुग्ने गरेका छन्। झरनाको चिसो पानी र आसपासको शान्त वातावरणले पर्यटकलाई केही समय प्रकृतिसँग रमाउने अवसरसमेत प्रदान गरेको छ ।
पर्यटकको आगमन बढेसँगै स्थानीयस्तरमा पर्यटन व्यवसायको सम्भावनासमेत बढ्दै गएको छ। झरना आसपास खाने तथा बस्ने सुविधासहितका होटल तथा अन्य सेवा सञ्चालनमा आउन थालेका छन्। यसले पर्यटकलाई सहज हुनुका साथै स्थानीयको आयआर्जनको बाटोसमेत विस्तार गरेको छ ।
