ताप्लेजुङ र पाँचथर जिल्लाको सिमानामा समुद्री सतहबाट करिब ४,३०० मिटरको उचाइमा अवस्थित टिम्बुङ पोखरी प्राकृतिक सौन्दर्य र धार्मिक आस्थाले भरिएको रमणीय गन्तव्य हो। हिमाली दृश्य, हरिया डाँडाकाँडा र विविध प्राकृतिक वनस्पतिले घेरिएको पोखरी क्षेत्रले यहाँ पुग्ने जोकोहीलाई आकर्षित गर्छ।
मनसुनको समयमा टिम्बुङ पोखरी आसपास विभिन्न प्रजातिका रंगीचंगी फूलहरू फुल्छन्। विशेषगरी केन्जो फूलले पोखरी वरिपरिको भू–दृश्यलाई अझ मनमोहक बनाउँछ। फूल फुल्ने मौसममा नीलो आकाश, हरिया डाँडा, हिमाली दृश्य र रंगीचंगी फूलको संयोजनले टिम्बुङ पोखरीको सौन्दर्यलाई थप जीवन्त बनाउँछ।
धार्मिक रूपमा समेत महत्त्वपूर्ण मानिने टिम्बुङ पोखरीमा स्थानीयवासी तथा श्रद्धालुहरू दर्शन र पूजाआजाका लागि पुग्ने गर्छन्। प्राकृतिक सौन्दर्यसँगै शान्त वातावरण र पदयात्राको अनुभव लिन चाहनेहरूका लागि पनि यो आकर्षक गन्तव्य हो। कठिन र चुनौतीपूर्ण पहाडी बाटो पार गरेर पुग्नुपर्ने भएकाले टिम्बुङ पोखरीको यात्रा आफैंमा रोमाञ्चक र साहसिक अनुभव बन्ने गर्छ।
प्राकृतिक सौन्दर्य र जैविक विविधताले सम्पन्न टिम्बुङ पोखरी क्षेत्रको संरक्षणसँगै व्यवस्थित पर्यटन प्रवर्द्धन गर्न सके यस क्षेत्रलाई पूर्वी नेपालको आकर्षक पर्यटकीय गन्तव्यका रूपमा थप विकास गर्न सकिने सम्भावना छ। तस्बिरः गिरिराज बाँस्कोटा/नेपाल फोटो सर्भिस (NPS)
