काठमाडौं — वसन्तपुर दरबार क्षेत्रमा देवराज इन्द्रको पूजा–आजा गर्दै हर्षोल्लासका साथ ऐतिहासिक तथा सांस्कृतिक पर्व इन्द्रजात्रा मनाइएको छ। पर्वको मुख्य आकर्षण जीवित देवी कुमारी, गणेश र भैरवको रथयात्रा रहेको थियो ।
इन्द्रजात्रा स्थल वसन्तपुर क्षेत्रमा राष्ट्रपति रामचन्द्र पौडेल, उपराष्ट्रपति रामसहाय यादव, प्रधानमन्त्री केपी शर्मा ओली, सभामुख देवराज घिमिरे, राष्ट्रियसभाका अध्यक्ष नारायणप्रसाद दाहाल, मन्त्रीहरू तथा काठमाडौं महानगरपालिकाका मेयर बालेन शाहलगायतको सहभागिता थियो। परम्पराअनुसार हनुमानढोकास्थित गद्दी बैठकबाट राष्ट्रपतिले जीवित देवीका रूपमा रहेका श्रीकुमारी, श्रीगणेश र श्रीभैरवको रथयात्रा अवलोकन गरे।
भाद्र शुक्ल द्वादशीका दिन हनुमानढोका अगाडि धार्मिक विधिअनुसार इन्द्रध्वजसहितको लिङ्गो ठड्याइएपछि यो पर्व औपचारिक रूपमा सुरु हुन्छ। ‘इन्द्रध्वजोत्थान’ भनिने सो अवसरमा लिङ्गोको फेदमा भैरवको पूजा गर्ने परम्परा रहिआएको छ।
