काठमाडौं, वैशाख — राष्ट्रिय फोटो पत्रकार समूह नेपाल (एनएफपीजे) का प्रतिनिधिहरूले सभामुख डीपी अर्यालसँग भेट गरी संसदीय रिपोर्टिङका क्रममा फोटो पत्रकारहरूले भोग्नुपरेका विविध समस्याबारे ध्यानाकर्षण गराएका छन्।
सिंहदरबारस्थित सभामुखको कार्यकक्षमा भएको भेटमा एनएफपीजेका अध्यक्ष प्रदीपराज वन्तको नेतृत्वमा गएको टोली सहभागी थियो। सो अवसरमा अध्यक्ष वन्तले सभामुख अर्याललाई पदभार ग्रहणको बधाई दिँदै फोटो पत्रकारहरूले कार्यक्षेत्रमा भोगिरहेका चुनौतीहरूबारे विस्तृत जानकारी गराए।
उनले विशेषगरी संसद् परिसरभित्र फोटो खिच्ने स्थानको अभाव, पहुँचसम्बन्धी कठिनाइ तथा कार्यसम्पादनमा देखिएका अवरोधहरू समाधान गर्न समन्वयात्मक पहल आवश्यक रहेको बताए।
सभामुख अर्यालले हाल संसद् बैठक सञ्चालन भइरहेको स्थान अस्थायी भएकाले यस्ता समस्या देखिएको उल्लेख गर्दै नयाँ संसद् भवन सञ्चालनमा आएपछि अवस्था सुधार हुने विश्वास व्यक्त गरे। उनले नयाँ भवन सञ्चालनका लागि तयारी तीव्र गतिमा अघि बढिरहेको र छिट्टै कार्यान्वयनमा आउने जानकारी पनि दिए।
फोटो पत्रकारहरूको पेशागत हकहित तथा कार्यसुविधा सुनिश्चित गर्न आफू प्रतिबद्ध रहेको बताउँदै सभामुख अर्यालले आवश्यक सहयोग गर्ने प्रतिबद्धता जनाए।
