काठमाडौं – संघीय लोकतान्त्रिक गणतन्त्र स्थापना भएको १८ वर्ष पूरा भएको अवसरमा बिहीबार देशभर विभिन्न कार्यक्रम गरी गणतन्त्र दिवस मनाइएको छ। राजधानीको टुँडिखेलस्थित सैनिक मञ्चमा आयोजित विशेष समारोहमा राज्यका उच्च पदस्थ अधिकारी, सुरक्षा निकायका प्रमुख तथा सर्वसाधारणको उल्लेख्य सहभागिता रहेको थियो।
२०६५ साल जेठ १५ गते जननिर्वाचित पहिलो संविधानसभाले निरंकुश राजतन्त्रको औपचारिक अन्त्य गर्दै नेपाललाई संघीय लोकतान्त्रिक गणतन्त्र घोषणा गरेको दिनको सम्झनामा हरेक वर्ष गणतन्त्र दिवस मनाइँदै आएको छ।समारोहअघि बिहानै नेपाली सेनाले गणतन्त्र दिवसको सम्मानमा तोप पड्काएको थियो। त्यसपछि बिहान ८ बजेदेखि सैनिक मञ्चमा औपचारिक कार्यक्रम सुरु गरिएको थियो। कार्यक्रममा राष्ट्रपति रामचन्द्र पौडेल, प्रधानमन्त्री बालेन्द्र शाह लगायत विशिष्ट व्यक्तित्वहरूको सहभागिता रहेको थियो। समारोहलाई राष्ट्रपतिले सम्बोधन गरेका थिए भने प्रधानमन्त्री बालेनले सम्बोधन गरेनन्।
गणतन्त्र दिवसका अवसरमा रामचन्द्र पौडेलले राजनीतिक व्यवस्था र शासकीय संरचनामा हुने परिवर्तनबाट मात्र युगका अपेक्षा पूरा नहुने बताए । उनले राज्यसत्ताको चरित्र, आचरण, राजनीतिक निष्ठा र मूल्यमान्यतामा पनि परिवर्तन ल्याउन आवश्यक भएको बताए । “अन्यथा, व्यवहारले राजनीतिक परिवर्तनलाई पुष्टि गर्दैन”, राष्ट्रपति पौडेलले भने ।
गणतन्त्रको मर्यादालाई बचाउन र यसलाई अझ समृद्ध बनाउन राजनीतिक निष्ठा, मूल्यमान्यता एवं आचरणमा परिवर्तनसहित एकताबद्ध भएर लाग्नुपर्नेमा उनले जोड दिए । “यसका आफ्नै मूल्यमान्यता र नैतिक दायराहरू हुन्छन्, त्यसलाई बिर्सिएर हामीले इतिहासको अभिभारा पूरा गर्न सक्दैनौँ”, राष्ट्रपतिले भने।
सामाजिक न्याय, विकास र समृद्धि सङ्घीय लोकतान्त्रिक गणतन्त्रको उच्चतम र सार्थक अभ्यासमा अगाडि बढ्न तथा राजनीति, राज्य र राजकाजलाई नैतिकता, निष्ठा र मूल्यमान्यताको सीमाभित्र आबद्ध गर्न आजका दिनले प्रेरणा दिने उनले विश्वास व्यक्त गरे ।
समारोहमा नेपाली सेना, नेपाल प्रहरी, सशस्त्र प्रहरी बल तथा विभिन्न सांस्कृतिक समूहले कवाज, झाँकी तथा सांस्कृतिक प्रस्तुति प्रदर्शन गरेका थिए। ‘अब बन्छ मेरो देश’ भन्ने गीतमा सेना, प्रहरी र सशस्त्रका जवानहरू नृत्यु प्रस्तुत गर्दै गणतन्त्र स्थापनापछि हासिल उपलब्धि र राष्ट्रिय एकताको सन्देश प्रवाह गरिएको थियो।
