हेटौंडा – हेटौंडाका पत्रकार बलराम पुडासैनीलाई समाचार लेखेकै आधारमा गोली ठोक्छु भन्ने रामप्रसाद घिमिरे प्रहरी खोरमा परेका छन् ।
मकवानपुरगढी गाउँपालिका वडा नम्बर ३ मा निर्माण गरिएको स्ल्याब ढलानको विषयमा समाचार लेखेको भन्दै स्ल्याब ढलान निर्माण उपभोक्ता समितिका अध्यक्ष घिमिरेले तु खबर डटकमका पत्रकार बलराम पुडासैनीलाई फोनमार्फत धम्की दिएका थिए ।
गढी गाउँपालिका वडा नम्बर ३ मक्रानडाँडाका घिमिरेले समाचारको विषय जोड्दै पत्रकार पुडासैनीलाई फोन मार्फत अश्लिन गाली गर्दै गोली ठोक्छु भनेका थिए । उनले ज्यान मार्ने धम्कि दिएपछि पुडासैनीले जिल्ला प्रहरी कार्यालय मकवानपुरमा जाहेरी दिएका थिए । जाहेरीको आधारमा घिमिरेलाई प्रहरीले पक्राउ गरी जिल्ला प्रहरी कार्यालयको हिरासतमा राखिएको छ ।
३ नम्बर प्रदेश सरकारको अनुदान सहयोगमा गढी गाउँपालिका वडा नम्बर ३ मा ५० लाखको लागतमा केही समयअघि निर्माण भएको स्ल्याब ढलान निर्माणमा लापरवाहीपछि अहिले केही स्थानमा चर्किएर सवारी साधनसमेत चल्न नसक्ने अवस्थामा छ ।
