काठमाडौँ- काठमाडौँमा शुक्रबारदेखि पहिलो ‘काठमाडौँ फिल्म फेस्टिभल’ सुरु भएको छ। काठमाडौँ महानगरपालिकाको आयोजनामा सुरु भएको तीनदिने महोत्सवको उद्घाटन समारोहमा सहभागी अतिथिहरूलाई महाकाली नाचलगायत विभिन्न सांस्कृतिक प्रस्तुतिमार्फत स्वागत गरिएको थियो।
महोत्सवमा नेपालसहित विभिन्न देशका फिल्मकर्मी, निर्देशक, कलाकार तथा चलचित्र क्षेत्रका विज्ञहरूको सहभागिता रहेको छ। चलचित्र, कला तथा संस्कृतिको प्रवर्द्धन र अन्तर्राष्ट्रियस्तरमा नेपाली चलचित्र क्षेत्रको पहिचान विस्तार गर्ने उद्देश्यले महोत्सव आयोजना गरिएको हो।
महोत्सवमा भारतीय चर्चित अभिनेत्री शबाना आजमी, सांघाई फिल्म एकेडेमीका विशिष्ट प्राध्यापक मार्को मुलर, जापानी निर्देशक ताकायुकी नाकामुरा तथा भारतीय फिल्म प्रोग्रामर दीप्ति डीकुन्हालगायत अन्तर्राष्ट्रिय चलचित्र क्षेत्रका व्यक्तित्वहरूको सहभागिता रहेको छ।
तीन दिनसम्म सञ्चालन हुने महोत्सवमा विभिन्न देशका चलचित्रकर्मीबीच अनुभव आदानप्रदान, चलचित्र प्रदर्शन तथा चलचित्र क्षेत्रसँग सम्बन्धित विविध गतिविधि सञ्चालन हुनेछन्।
युनेस्कोको ‘क्रिएटिभ सिटी अफ फिल्म’ को सदस्यता प्राप्त काठमाडौँमा पहिलोपटक आयोजना गरिएको यस महोत्सवले सहरको कला, संस्कृति तथा चलचित्र क्षेत्रलाई अन्तर्राष्ट्रियस्तरमा चिनाउन सहयोग पुग्ने अपेक्षा गरिएको छ।
