काठमाडौँ – मनसुनी न्यून चापीय रेखा नेपालको दक्षिण तर्फ सरेकाले मनसुन कमजोर भए पनि बंगालको खाडीबाट जलवाष्प युक्त वायु प्रवेश गरेकाले देशका विभिन्न स्थानमा वर्षाको सम्भावना रहेको जल तथा मौसम पूर्वानुमान महाशाखाले जनाएको छ ।
यस्तै स्थानीय वायुको प्रभावका कारण पनि वर्षाको सम्भावना छ । हाल देशभर सामान्यदेखि पूर्ण बदली भएको छ र केही स्थानमा मेघ गर्जनसहित वर्षा जारी छ ।
शनिबार दिनभर देशभरको मौसम आंशिकदेखि सामान्य बदली हुने मौसमविदले बताएका छन् । केही स्थानमा वर्षाको सम्भावना छ । देशका थोरै स्थानमा ठूलो पानी पर्ने सम्भावना रहेको मौसमविदले उल्लेख गरेका छन् ।
केही स्थानमा ठूलो पानी पर्ने भएकाले पहाडी क्षेत्रमा पहिरो जान सक्ने तथा पहाड र चुरेबाट बहने खोलामा जल सतह बढ्न सक्ने भएकाले सामान्य सतर्कता अपनाउनु पर्ने उल्लेख गरिएको छ ।
