काठमाडौँ – विराट कोहली कप्तानीको रोयल च्यालेन्जर्स बैंग्लोर इन्डियन प्रिमियर लिग (आइपिएल) क्रिकेटबाट बाहिरिएको छ । शुक्रबार राति अबुधाबीमा भएको पहिलो एलिमिनेटरमा बैंग्लोरलाई सनराइजर्स हैदरावादले ६ विकेटले पराजित गरेको छ ।
१३२ रनको लक्ष्य हैदरावादले १९ ओभर चार बलमा मात्रै चार विकेटको क्षतिमा भेट्टाएको हो । उसका लागि केन विलियम्सनले नटआउट ५० तथा मयंक पाण्डे र ज्यासन होल्डरले समान २४–२४ रन बनाए ।
यसअघि पहिले ब्याटिङ्ग गरेको बैंग्लोरले सात विकेटको क्षतिमा १३१ रन बनाएको थियो । उसका लागि एबी डी भिल्लियर्सले ५६ तथा एरोन फिन्चले ३२ रन बनाउनु बाहेक अरुले दोहोरो अंकमा रन बनाउन सकेनन् । कप्तान कोहलीले मात्रै ६ रन बनाए ।
विजयी भएको हैदरावादले आइतबार दोस्रो क्वालिफायरमा दिल्लीको सामना गर्ने छ । सो खेलमा विजयी हुनेले नोभेम्बर १० मा उपाधिका लागि मुम्बई इन्डियन्ससँग खेल्ने छ ।
