नेपाली फुटबलको राष्ट्रिय टोली कोरोना महामारी कारण लामो समयपछि आज मैदानमा उत्रिदै छ । नेपालले आज बंगलादेशसँग मैत्रीपूर्ण खेल खेल्दैछ । ढाकास्थित बङ्बन्धु राष्ट्रिय फुटबल मैदानमा हुने खेल नेपाली समय अनुसार आज बेलुकी ४:४५ बजे हुनेछ।
एक वर्षभन्दा लामो समयपछि नेपाली टोलीले अन्तर्राष्ट्रिय फुटबल खेल्न लागेको हो । नेपालले गत वर्षको नोभेम्बर यता अन्तर्राष्ट्रिय फुटबल खेलेको छैन। नेपालले अन्तिमपटक विश्वकप छनोटअन्तर्गत कुवेतसँग खेलेको थियो । जसमा १–० गोलले पराजित भएको थियो।
त्यसयता कोरोना भाइरसको विश्वव्यापी महामारीका कारण कुनै अन्तर्राष्ट्रिय प्रतियोगितामा नेपाल सहभागी भएको थिएन। कोरोना भाइरसको महामारीबीच खेलकुदमा फर्कन बंगलादेशले नेपालसँग मैत्रीपूर्ण खेलको प्रस्ताव गरेको थियो। नेपाल र बंगलादेशबीच दोस्रो र अन्तिम मैत्रीपूर्ण खेल मंसिर २ गते हुने छ।
कोरोना महामारीका बीचमा पनि यस खेलमा निश्चित संख्यामा दर्शकलाई प्रवेश गराइने भएको छ। बंगलादेशफुटबल फेरेडेसन (बिएफएफ)ले दर्शकको संख्या नखुलाए पनि खेलका लागि टिकटको दर भने ताकेको छ।
बिएफएफको हिजो बसेको बैठकले भिआइपी प्याराफिटको टिकट मूल्य ५०० टाका र साधारण प्याराफिटको टिकट मूल्य १०० टाका तोकेको छ।
मैत्रीपूर्ण खेलमा रंगशाला आउने दर्शकले फिफा तथा एएफसीको स्वास्थ्य प्रोटोकलको पालना गर्नुपर्ने संघले जनाएको छ।
