डम्बर निदाल
डडेल्धुरा – डडेल्धुरामा एक विद्यालयले पठनपाठनसंगै विद्यालय हाता भित्र तरकारी तथा फलफुल खेती संचालन गरेको छ । जिल्लाको अजयमेरु गाउँपालिका—१ मा रहेको बाल कल्याण माध्यामिक विद्यालय पुईलेकले विद्यालयमा पठनपाठनसंगै विद्यालयको हाताभित्र तरकारी तथा फलफुल खेती संचालन गरेको हो ।
पछिल्लो समयमा शैक्षिक गुणस्तर सुधारका साथै विद्यालय परिसरभित्र विभिन्न किसिमका तरकारी तथा फलफुल खेती संचालन गरि विद्यालयको आम्दानीको श्रोत समेत जुटाउदै आएको छ । बि.सं.२०१६ सालमा स्थापना भएको उक्त सामुदायिक विद्यालयले २०७० सालदेखि कक्षा ९देखी १२ कक्षासम्म कृषि तथा बाली विज्ञानको पठनपाठन शुरुगरेको छ । करिब ९६ रोपनी क्षेत्रफल रहेको उक्त विद्यालयले ३० रोपनी क्षेत्रमा तरकारी खेती,च्याउखेती,माहुरीका घार,बेर्ना उत्पादन,माछा पालन तथा विभिन्न फलफुलका विरुवाहरु लगाएको विद्यालय व्यवस्थापन समिति अध्यक्ष धन बहादुर साउदले बताए ।
प्राविधिकधार तथा सामुदायिक तर्फका गरी करिब ५ सय भन्दा बढी विद्यार्थी रहेको उक्त विद्यालयमा बहुउद्धेश्यिय खानेपानीको व्यवस्थापन गरिएको छ । विद्यालय हाता भित्र ७ वटा खानेपानीका धारा र सिचाईका लागी छुट्टै ७ वटा धाराहरु जडान गरिएको छ । सिचाईका लागी २ पोखरी निर्माण गरीएको छ । एक पोखरी माछा पालनका लागी प्रयोग गर्ने र अर्को पोखरी अन्य कामका लागी प्रयोग गरीने उनले बताए ।
विद्यालयको परिसरभित्र ५ वटा पोलिहाउस बनाईका छन् जसमा च्याउ खेती,भित्र गोलभेडा खेती गरिएको छ । यसै गरी कागती,सुन्तला,आँप,अमिलो,ओखर,किबि,नास्पाती लगायत बिभिन्न फलफुलका विरुवाहरु लगाईएको यसका साथै विभिन्न किसिमका जडिबुटीका बोटबिरुवा दालचिनी,बेसार,कोईराल तितेपाती, घ्युकुमारी,आदि लगाएको अध्यक्ष साउदले बताए ।
शिक्षालाई ब्यवसायिक प्राबिधिक गुणस्तर सहित आर्थिक उत्पादन संग जोडने बिकल्पका रुपमा विद्यालयलाई देशकै शैक्षिक पर्यटकिय हबका रुपमा विकास गर्ने लक्ष्य रहेको विद्यालय व्यवस्थापन समिति अध्यक्ष साउदको भनाइ छ ।
दशैदेखी भाईटिकासम्म विद्यालयको पठन पाठन बन्द गरिएकोले विद्यालयमा लगाईएका तरकारी, फलफुल खेतीको तथा तरकारीका बेर्नाहरुको रेखदेदमा विद्यालय व्यवस्थापन समितिका पदाधिकारी सहित शिक्षकहरुले पनि सहयोग गरीरहेको अध्यक्ष साउदले बताए ।
