काठमाडौं – साविक विजेता पुलिसलाई ७ विकेटले हराउँदै बागमती प्रदेशले चौथो संस्करणको प्रधानमन्त्री कप राष्ट्रिय एकदिवसिय क्रिकेट प्रतियोगितामा सानदार विजयी सुरुवात गरेको छ ।
जितको लागि १ सय १२ रनको सामान्य विजयी लक्ष्य पछ्याएको बागमतीले ३४।४ ओभरमा ३ विकेट गुमाउँदै पूरा गर्यो । बागमतीका मध्यक्रमका ब्याट्सम्यान तथा उपकप्तान पृथु बास्कोटा ६६ बलमा ५ चौका र ३ छक्का सहित ४८ रनमा अविजित रहे । ईशान पान्डे ६६ बलमा २ चौका सहित १७ रनमा अविजित रहे । पृथुले ३५ औं ओभरको चौथो बलमा स्पिनर ललितनारायण राजवंशीलाई लङअनमा उत्कृष्ट छक्का प्रहार गर्दै खेल सकाएका थिए ।
त्यसअघि टियु क्रिकेट मैदानमा टस हारेर ब्याटिङ थालेको पुलिस २९।३ ओभरमा १ सय ११ रनमा अल आउट भएको थियो । बागमतीको बलिङ सामु पुलिसका कुनैपनि ब्याट्सम्यानले क्रिजमा टिकेर जिम्मेवारी प्रर्दशन गर्न नसक्दा सस्तैमा अल आउट हुन पुगेको थियो ।
पुलिसले दोस्रो खेलमा टियुमा माघ ७ मा सुदूरपश्चिमविरुद्ध खेल्ने छ । यस्तै, बागमतीले सोमबार टियुमा सुदूरपश्चिमसँग खेल्ने छ ।
