काठमाडौँ – एमाले अध्यक्ष ओली प्रधानमन्त्री रहँदा प्रेस सल्लाहकार रहेका एमाले नेता सूर्य थापाले ‘पार्टीको बैठकमा नआउने तर गुटकाे भेलालाई बैठक नै भनेर हल्ला गर्ने ?’ भन्दै नेपाल समूहकाे बैठकप्रति प्रश्न उठाएका छन् । उनले माधव समूहले गाईजात्रा नभएर गाेरुजात्रा नै गर्न लागेकाे समेत बताएका छन् ।
सामाजिक सञ्जालमार्फत थापाले भनेका छन्, ‘संविधान, कानुन, विधान, विधि र पद्धतिअन्तर्गत त यस्ताे अनधिकृत र गैरकानुनी कार्य गर्न पाइँदैन । अझ माधव कु. नेपालकाे विधि,पद्धतिकाे रटानविपरीत यसाे गर्न किमार्थ मिल्दैन । खासमा यसाे गर्नु गाईजात्रा नभएर गाेरूजात्रा नै हुन्छ !’
नेपाल पक्षको केन्द्रीय सदस्यहरूको बैठक अहिले ११ बजे शंखमुलस्थित क्वालिटी पार्टी प्यालेसमा बस्ने गरी आह्वान गरिएको छ।
यसअघि बुधबारका लागि तय भएको बैठक केन्द्रीय सदस्यहरु उपत्यकाबाहिर रहेकाले सारिएको थियो। एमालेभित्रको एकता र भावी रणनीतिका विषयमा छलफल गर्न नेपालले केन्द्रीय सदस्यहरूको बैठक बोलाएको एक नेताले बताए।
यसैबीच, पार्टी अध्यक्ष ओलीपक्षले भने नेपाल समूहको बैठकलाई अनधिकृत भनेको छ।
बुधबार साँझ केन्द्रीय कार्यालय सचिव शेरबहादुर तामाङले एक विज्ञप्ति निकाल्दै बिहीबार बस्न लागेको नेपाल पक्षको केन्द्रीय कमिटी बैठक अनधिकृत भएको बताएका छन्।