काठमाडौं – छैटौं संस्करणको एनभीए महिला तथा पुरुष क्लब भलिबल च्याम्पियनसिप अन्तर्गत हेल्प नेपाललाई पराजित गर्दै त्रिभुवन आर्मी क्लबले पुरुषतर्फको उपाधि जितेको छ ।
त्रिपुरेश्वरस्थित राखेप कभर्डहलमा शनिबार भएको फाइनलमा साविक विजेता हेल्प नेपाललाई ३-१ को सेटमा पराजित गर्दै आर्मी च्याम्पियन बनेको हो ।
रोमान्चक बनेको खेलमा आर्मीले पहिलो सेट २६-२४ ले जितेको थियो । भारतीय खेलाडीले भरिएको हेल्प नेपालले दोस्रो सेट २५-१७ ले जित्न सफल भयो ।
तेस्रो सेटमा आर्मीले २५-१८ ले सहजै आफ्नो बनायो । तर, चौंथो सेट ३३-३१ को संघर्षपूर्ण सेटमा जित निकाल्दै आर्मीले उपाधि आफ्नो बनाएको हो । पुरुषतर्फ नेपाल पुलिस क्लबले तेस्रो स्थान हासिल गर्यो ।
महिलातर्फको उपाधि न्यु डायमन्ड स्पोर्ट्स क्लबले हात पार्यो । शनिबार नै भएको फाइनलमा साविक विजेता एपीएफ क्लबलाई ३-१ को सेटमा पराजित गर्दै न्यु डायमन्ड च्याम्पियन बनेको हो ।
पहिलो सेट गुमाएको न्यु डायमन्डले उत्कृष्ट पुनरागमन गरेको थियो । एपीएफले पहिलो सेटमा न्यु डायमन्डलाई २६-२४ ले हराएको थियो ।
तर, त्यसपछिको सेटमा न्यु डायमन्डले एपीएफमाथि २५-२१, २५-१७ र २५-१५ को जित निकाल्यो ।
महिलातर्फ त्रिभुवन आर्मी क्लब तेस्रो भयो । च्याम्पियनसिपको महिला र पुरुष दुबैको विजेताले ४ लाख प्राप्त गरे । उपविजेताले २ लाख प्राप्त गर्दा तेस्रोले १ लाख प्राप्त गरेका छन् ।
नेपाल भलिबल संघले आयोजना गरेको च्याम्पियनसिपमा पुरुषतर्फ १४ टोली र महिलातर्फ ६ टोलीको सहभागिता रहेको थियो ।