काठमाडौं- संयुक्तराज्य अमेरिकी सेनाका एशिया–प्रशान्त क्षेत्र प्रमुख चार्ल्स ए फ्लिनले सैनिक मुख्यालय जङ्गी अड्डाको भ्रमणका साथै प्रधानसेनापति प्रभुराम शर्मासँग पनि भेटवार्ता गरेका छन् ।
चारदिने औपचारिक सद्भावना भ्रमणका लागि बिहीबार नेपाल आएका फ्लिनले शुक्रबार सैनिक मुख्यालय जङ्गी अड्डाको भ्रमण र प्रधानसेनापति प्रभुराम शर्मासँग भेट वार्ता गरेका हुन् ।
भेटमा उनीहरुबीच द्विपक्षीय आपसीहितका विविध विषयमा छलफल भएको सेनाले जनाएको छ ।नेपाल बसाइँका क्रममा फ्लिन र उनका भ्रमणदलका सदस्यहरु शनिबार माउन्टेन फ्लाइटमा सहभागी हुनेछन् ।
चार्ल्स ए फ्लिनको सम्मानमा नेपाली सेनाले जंगी अड्डा परिसरमा सम्मानगारत अर्पण गरेको छ। यस्तै नेपाली सेनाको अपरेशनल गतिविधिका बारेमा प्रस्तुतीकरण गरेको छ।
साथै आइतबार काभ्रेको पाँचखालमा रहेको वीरेन्द्र शान्तिकार्य तालिम केन्द्र अवलोकन र शिवपुरी सैनिक कमाण्ड तथा स्टाफ कलेजको भ्रमण गर्ने गरी स्वदेश फर्किने कार्यक्रम रहेको छ ।
