नेकपा एमालेका अध्यक्ष केपी शर्मा ओलीले चासोका साथ दुई निर्वाचन क्षेत्रमा आफ्ना आधिकारिक उम्मेदवार फिर्ता गराएर अरुलाई सर्मथन गरेका छन्।
एमाले अध्यक्ष ओलीले चितवन–३ र डडेलधुरामा एमालेको सूर्य चिह्नबाट उठेका उम्मेदवारलाई फिर्ता गराएर बागी र बीपी कांग्रेसको तर्फबाट उठेका उम्मेदवारलाई सर्मथन गरेका छन्।
डडेलधुरामा प्रतिनिधिसभातर्फ एमाले उम्मेदवार चक्र स्नेहीले उम्मेदवारी फिर्ता लिएका छन्। यससँगै बीपी कांग्रेसका कर्ण मल्ललाई सघाउने निर्णय कार्यान्वयन हुने एमालेले जनाएको छ।
एमालेको केन्द्रबाट नै स्नेहीको उमेदवारी फिर्ता गर्न पहल भएको एमाले डडेलधुराका सचिव गजेन्द्र शाहीले बताएका छन्।
यसैगरी, कांग्रेसका बागी उम्मेदवार दानबहादुर पाल र राष्ट्रिय प्रजातन्त्र पार्टी नेपालका कालिप्रसाद जोशीले पनि उम्मेदवारी फिर्ता लिएका छन्।
एकीकृत समाजवादीबाट भर्खरै एमालेमा फर्केर स्वतन्त्र उम्मेदवारी दिएका विक्रमबहादुर शाहीको उम्मेदवरी भने कायम छ।
यता चितवन क्षेत्र नं. ३ मा नेकपा एमालेले आफ्नो उम्मेदवारी फिर्ता लिएर सत्तारुढ गठबन्धनबाट बागी बनेका उम्मेदवारलाई समर्थन गरेको छ ।
एमालेले रामप्रसाद न्यौपानको उम्मेदवारी फिर्ता लिएर स्वतन्त्र उम्मेदवारी दिएका नेपाली कांग्रेसका दिनेश कोइरालालाई समर्थन गरेको छ ।
चितवनको मुख्य निर्वाचन अधिकृतको कार्यालयमा नेकपा एमालेका अध्यक्ष केपी शर्मा ओलीको हस्ताक्षरसहितको पत्र पठाएर न्यौपानेको उम्मेदवारी फिर्ता लिइएको छ ।
