नेपाली कांग्रेसले संसदीय दलको नेताको उम्मेदवारी शूल्क ५१ हजार तोकेको छ। आगामी ६ गते संसदीय दलको नेता छान्न चुनाव गर्ने कार्यतालिका छ।
निर्वाचन समितिले सोमबार निकालेको निर्वाचन कार्यातालिकामा दलको नेतामा उम्मेदवारी दिन चाहने शूल्क ५१ हजार तिर्नुपर्ने जनाएको छ।
कांग्रेसमा सभापति शेरबहादुर देउवा र गगन थापा, शेखर कोइराला दलको नेता बन्ने दौडमा छन्। ४ मंसिरको प्रतिनिधि सभाको चुनावमा कांग्रेसले प्रत्यक्षतर्फ ५७ र समानुपातिकतर्फ ३२ सिट जितेको छ।
कांग्रेसको दलको नेतामा देउवा बलिया दाबेदार हुन्। यद्यपि सर्वसम्मतको पहलमा नेताहरु लागेका छन्। बुधबार बिहान चुनाव गर्नेगरी कांग्रेसले कार्यतालिका सार्वजनिक गरिसकेको छ।
यसअघि बसेको कार्यसम्पादन समितिको बैठकको निर्णयअनुसार कांग्रेसले दलको नेता छान्न निर्वाचन कार्यकतालिका सार्वजनिक गरेको हो।
संसद सचिवालयले कांग्रेस दलको नेता चयनसम्बन्धी निर्वाचन कार्यतालिका सार्वजनिक गरिएकाे छ। कांग्रेस दलको नेताका लागि सभापति शेरबहादुर देउवा बलिया दाबेदार हुन्। संस्थापन इतरबाट डा. शेखर कोइराला र महामन्त्री गगन थापाहरुले पनि दलको नेताका लागि दबाब बढाइरहेका छन्।
कांग्रेसमा दलको नेताका लागि सर्वसम्मत सम्भावना सकिएपछि चुनावको तयारी गरिएको हो। कांग्रेसले संसदीय दलको निर्वाचन तयारीका लागि केन्द्रीय कार्यसम्पादन समितिको बैठक आइतबार राखेको थियो।
उक्त बैठकले दलको निर्वाचनका लागि सहमहामन्त्री भीष्मराज आङ्देम्बेको नेतृत्वमा तीन सदस्यीय निर्वाचनमण्डल बनाइसकेको छ। प्रधानमन्त्री समेत रहेका देउवाले शनिबार नवनिर्वाचित सांसदहरुलाई बालुवाटार बोलाएर बधाई दिइसकेका छन्।
त्यसपछि केन्द्रीय कार्यसम्पादन समितिको बैठक पनि बसिसकेको छ। नयाँ सरकार बन्ने रस्साकस्सी चलिरहँदा कांग्रेसमा संसदीय दलको नेताबारे सहमति नहुँदा निर्वाचनबाटै चयन गरिने भएको हो।
कांग्रेसको इतर समूहमा सहमति नहुँदा देउवा नै दलको नेता हुने करिब पक्का जस्तै छ। महामन्त्री थापाले आफूलाई भावी प्रधानमन्त्रीका रुपमा प्रस्तुत गरेर काठमाडौं ४ बाट चुनाव जितिसकेका छन्। उता मोरङ ६ बाट विजयी शेखरले पनि संसदीय दलमा जाने योजना बनाएका छन्। तर दुवैजना इतर समूहका हुन्।
एकै गुटका यी दुईजनाबीच सहमति नभइरहेको अवस्थामा दलको निर्वाचन हुँदैछ। निर्वाचन आयोगले मंसिर ४ मा सम्पन्न प्रतिनिधि सभा र प्रदेश सभा निर्वाचनको अन्तिम परिणामको प्रतिवेदन बिहीबार नै राष्ट्रपति विद्यादेवी भण्डारीसमक्ष बुझाइसकेको छ।
