काठमाडौंको शंखरापुर नगरपालिकामा ‘मिडिया र समाज’ विषयक अन्तर्क्रिया सम्पन्न भएको छ । अन्नपूर्ण टाइम्स र क्रियटिभ जर्नलिस्ट समूहको अगुवाइमा विभिन्न मिडियामा काम गर्ने १ सय ५५ जना पत्रकारमाझ कार्यक्रम गरिएको हो ।
शनिबार बिहान कात्तिके डाँडामा भएको कार्यक्रममा वरिष्ठ पत्रकार टंक पन्त, अरुणदेव जोशी, श्रमजीवी पत्रकार संघका अध्यक्ष जन्मदेव जैसीलगायतले समाजलाई सही दिशानिर्देश गर्न मिडिया र पत्रकारको भूमिकाबारे प्रकाश पारेका थिए ।
युटुयुबसहितका सोसल मिडियामा आउने विषयवस्तुले समाजलाई प्रभावित गर्ने भएकाले यस्ता विषयवस्तु सत्य, तथ्य र ज्ञानबद्र्धक हुनुपर्नेमा वक्ताहरुको जोड थियो ।
काठमाडौंस्थित विभिन्न मिडियामा आबद्ध १ सय ५५ जना सञ्चारकर्मी कार्यक्रममा सहभागी थिए । केही सञ्चारकर्मी काठमाडौं उपत्यकाबाहिरका पनि थिए ।
कार्यक्रमलाई सफल पार्न काठमाडौंको गोकर्णेश्वर नगरपालिका, शंखरापुर नगरपालिका, चन्द्रागिरी नगरपालिकाले आर्थिक सहयोग गरेका थिए । यसैगरी नेपाल बैंक लिमिटेड र कृषि विकास बैंक लिमिटेडले आफ्नो सामाजिक उत्तरदायित्वअन्तर्गत पत्रकारहरुको अन्तर्क्रिया कार्यक्रमलाई सफल बनाउन सहयोग गरेका थिए ।
कार्यक्रममा सहभागी र सहयोगी सबैलाई आयोजक संस्था अन्नपूर्ण टाइम्सका अध्यक्ष घनश्याम श्रेष्ठले धन्यवाद ज्ञापन गरे । साथै आगामी दिनमा पनि पत्रकारको क्षमता विकास र समाजले खोजिरहेका विषयवस्तुमाथिको विमर्शलाई निरन्तर अघि बढाउने प्रतिबद्धता पनि जनाए ।
