काठमाडौं – रामेछापको सदरमुकाम मन्थलीमा नेकोस बागमती प्रदेश पुरुष भलिबल प्रतियोगिता हुने भएको छ ।
नेपाल खेलकुद महासंघ बागमती प्रदेश कमिटीले सोमबार पत्रकार सम्मेलनको आयोजना गर्दै प्रतियोगिता माघ ४ गते बुधबारबाट ७ गतेसम्म संचालन हुने जनाएको छ ।
प्रतियोगितामा बागमती प्रदेशका १३ वटै जिल्लाका टोलीले सहभागिता जनाउने अध्यक्ष सीताराम कार्कीले जानकारी दिए ।
प्रतियोगिताको विजेता टोलीले २ लाख नगदसहित, शिल्ड, मेडल र प्रमाणपत्र पाउने छन्।
त्यस्तै द्वितीय, तृतीय र चौथो हुनेले क्रमशः १ लाख, ५० हजार र ३० हजार पुरस्कार, सिल्ड, मेडल र प्रमाणपत्र पाउने छन्।
कार्यक्रम उद्घाटन गर्न एमाले सचिव गोकर्ण विष्टलगायतका नेताहरू रामेछाप पुग्ने आयोजकले जानकारी दिएको छ।
