नेपाल प्रहरीका पूर्व आईजी ध्रुवबहादुर प्रधानले कानून मन्त्रालयको जिम्मेवारी पाएका छन् । मंसिर ४ गतेको चुनावमा नवलपरासी–२ (सुस्ता पश्चिम) बाट सानदार जीत दर्ता गरेका प्रधानले महत्त्वपूर्ण कानून मन्त्रालयको जिम्मेवारी पाएका हुन् । उनी राप्रपाका उपाध्यक्ष पनि हुन् ।
प्रधान २०५३ सालमा नेपाल प्रहरीको प्रमुख भएका थिए । प्रधानले पूर्व गृहराज्यमन्त्री एवं कांग्रेस उम्मेदवार देवेन्द्रराज पाण्डेलाई १५ हजार १७० मतान्तरले पराजित गरेका थिए । प्रधानले ३४ हजार ७६४ मत पाउँदा कँडेलले १९ हजार ५९४ मत मात्रै पाएका थिए । चौथोपटक पनि कँडेलको सांसद बन्ने बाटो छेक्दै प्रधान सांसदमा भारी मतान्तरले विजयी हुन सफल भएका थिए ।
प्रधान नेपाल ओलम्पिक कमिटीका पूर्व अध्यक्ष पनि हुन् । नेपाल प्रहरीको महानिरीक्षकबाट अवकाश पाएपछि राजनीतिमा सक्रिय प्रधान तेस्रो पटकको प्रयासमा सफल भएका हुन् ।
आईजी भएको ३६ दिनमै सरकारले ०५३ चैतमा अच्युतकृष्ण खरेललाई हटाएर ध्रूबबबहादुर प्रधानलाई आईजी बनाएको थियो। त्यसविरुद्ध खरेल सर्वोच्च अदालत गएका थिए।
अदालतको आदेशमा पुनः ०५४ मंसिरमा प्रधानलाई हटाएर खरेल आईजीपी भए।
अदालतको आदेशपछि आईजीबाट हटेर ध्रूबबहादुर प्रधान प्रधानमन्त्रीको सुरक्षा सल्लाहकार बनेका थिए। सल्लाहकारबाट राजीनामा दिएर उनी ०५६ को आम निर्वाचनमै होमिए। नवलपरासी–४ बाट चुनाव लडेका उनले हार ब्यहोरे। ०६४ र ०७० पनि सोही ठाउँबाट चुनाव लडेका उनी विजयी हुन सकेनन्।
प्रत्यक्ष निर्वाचनमा पटक–पटक हार ब्यहोरेका उनी ०७४ को चुनावमा भने राप्रपाको समानुपातिक सूचीमा बसे। तर, ३ प्रतिशत थ्रेसहोल्डका कारण सांसद बन्ने उनको सपना पूरा हुन सकेन।
पटक–पटक असफलता ब्यहोरेका पूर्वआईजी प्रधान संसद् छिर्ने सपनासहित यो पटक फेरि राप्रपाबाट उम्मेदवारी दिएका थिए ।
