काठमाडौँ – राष्ट्रिय फोटो पत्रकार समूह,नेपाल (एनएफपिजे)ले आगामी चैत्र दोस्रो साता पत्रकारहरूबीच फुट्सल प्रतियोगिता आयोजना गर्ने गरि आफ्नो टिम बनाउन प्रशिक्षणमा जुटेको छ ।
शनिबार सानो भर्याङस्थित स्वस्तिश्री गुरुकुल स्कुलमा फुट्सल प्रशिक्षण थालेको हो । विगत वर्षमा झैं यस वर्ष पनि विभिन्न सञ्चार संस्थामा आबद्ध भएका फोटो पत्रकार तथा पत्रकारहरुको टिमबीच फ्रेण्डसिप खेल आयोजना गर्दैछ ।
आगामी बैशाखमा बंगलादेशको फोटो पत्रकार लगायत नारायणगञ्ज क्वलका सदस्यहरूसँग तय भएको मैत्रिपूर्ण फुटबल खेलका लागि राष्ट्रिय फोटो पत्रकार समूह, नेपाल एनएफपिजेले तयारी सुरु गरेको हो ।
‘स्वास्थ्यका लागि खेलकुद’ भन्ने नाराका साथ संस्थाका साथीहरू स्वस्थ पनि रहुन र अन्य संघसंस्थासंग पनि मैत्रिपूर्ण खेल खेल्न सकियोस् भन्ने उद्देश्यले फुट्सल मार्फत प्रशिक्षण थालेको एनएफपिजेका कार्यवहाक महासचिव घनश्याम श्रेष्ठले बताए।
उनले बंगलादेशका फोटो पत्रकार साथीहरू पहिले देखि नै मैत्रिपूर्ण फुटबल खेल्न नेपाल आउन इच्छुक रहेकाले सो तयारी स्वरुप अभ्यास थालेको पनि जानकारी दिए ।
फुट्सल खेल्नको लागि शनिबार पहिलो दिन नै उत्साहजनक सहभागिता रहेको थियो । आगामी दिनमा प्रत्येक शनिबार संस्थाका साथीहरू मिलेर नियमित फुट्सल खेल्ने एनएफपिजेले जनाएको छ।
यसअघि राष्ट्रिय फोटो पत्रकार समूह (एनएफपिजे) को २५ औँ वार्षिक उपलक्ष्यमा पनि फुट्सल प्रतियोगिता आयोजना गरिएको थियो। जसमा १२ टिमले सहभागीता जनाएका थिए । प्रतियोगितामा हाम्रो फुटसल पत्रकार टिमले उपाधि जितेको थियो ।
