काठमाडौँ – नेपाल क्रिकेट संघ (क्यान) का अध्यक्ष चतुरबहादुर चन्दले सन्दीप लामिछाने वेस्ट इन्डिज आउन नेपालमा अवरोध हुन सक्छ भनेर एक हप्ताअघि नै सुटुक्क क्यानडा पुगेको जानकारी दिएका छन् । नेपाल ट्युब अस्ट्रेलियासँग कुराकानी गर्दै चन्दले सन्दीप क्यानडामा नै बसेर एक हप्तादेखि अभ्यास गरिरहेको पनि जानकारी दिएका हुन् ।
उनले भने, ‘सन्दीप अफिसियल्ली हिजोमात्र वेस्ट इन्डिज पुगेका हुन् । तर, एक हप्ता अघि नै उनी नेपालबाट हिँडेको कसैलाई थाहा थिएन । क्यानडाको टोरन्टोबाट वेस्ट इन्डिजमा हप्ताको एक दिनमात्र फ्लाइट रहेछ । फेरि क्यानले चार्टर्ड फ्याइट गर्ने अवस्था थिएन ।’
उनले भने, ‘टोटरन्टोमा हुँदा पनि उनी निरन्तर अभ्यासमा नै थिए । यसमा पूर्वप्रशिक्षक पुबुदु दासनायकेले पनि भित्री रूपमा सहयोग गर्नुभयो ।’
उनले अमेरिकाको भिसा नपाए पनि वेस्ट इन्डिजमा खेलाउन कुनै कसर बाँकी नराख्ने भनेर क्यानले प्रयास गरेको खुलाए । यसका लागि पारस खड्का र विनोद दासलाई जिम्मा दिइएको उनको भनाई छ । ‘विभिन्न अवरोध र बाधा अड्चन हुन्थ्यो भनेर हामीले उनलाई गोप्य रूपमा पुर्याएका हौँ । यसमा हामी सफल भएका छौँ ,’ उनले भने ।
चन्दले नेपाललाई विश्वकपमा पुर्याउन सबैको भूमिका भए पनि सन्दीपको विशेष रहेको बताए ।
‘त्यसमा पनि सन्दीपको प्रमुख भूमिका थियो । अमेरिकाले भिसा उपलब्ध नगराएपछि कुनै हालतमा वेस्ट इन्डिजमा खेलाउने रणनीति थियो’, उनले भने, ‘उनलाई क्यानडा हुँदै वेस्ट इन्डिज पुर्याउन सचिव पारस र व्यवस्थापक विनोदले विशेष सक्रियता देखाए । उनी एक हप्ताअघि नेपालमा पनि अभ्यासरत थिए, क्यानडा हुँदै वेस्टइन्डिजमा पनि बलियो मनोबलसहित प्रशिक्षणरत छन् ।’
उनले सन्दीप राम्रो मनोबलमा रहेकाले विश्वकपमा छाप छाड्न सक्ने पनि बताए । ‘उसको जन्म क्रिकेट खेल्नकै लागि भएको हो । उसले नेपालले आशा गरेअनुरुप खेल्नेछ’, चन्दले प्रशंसा गर्दै भने ।
