बिहीबार (असोज २४ गते) दसैँको मुख्य दिन सुरु हुँदै छ। असोज २४ गते सप्तमी अर्थात् फूलपाती हो।
यसपटक अष्टमी र नवमी भने एकैदिन असोज २५ गते (शुक्रबार) परेका छन् भने २६ गते विजया दशमी अर्थात् टीका हो।
यसैबीच दसैँका यी मुख्य ३ दिन मौसम कस्तो होला त भन्ने विषयमा जल तथा मौसम विज्ञान विभाग, मौसम पूर्वानुमान महाशाखाले बुलेटिन जारी गरेको छ।
जसअनुसार कोसी प्रदेश र मधेस प्रदेशमा तथा बागमती प्रदेश र गण्डकी प्रदेशका चाहिँ पहाडी भूभागमा मात्र हल्कादेखि मध्यमसम्म वर्षा हुने सम्भावना छ।
समग्रमा केही प्रदेशमा मनसुन बाँकी रहे तापनि दसैँमा वर्षाले खासै समस्या पार्ने देखिएको छैन।
किनकि मौसम महाशाखाले कतै पनि भारी वर्षा हुने सम्भावना देखाएको छैन। बरु चिसो भने केही बढ्न सक्ने अनुमान मौसम पूर्वानुमान महाशाखाले जनाएको छ।
बुधबार जारी दसैँ विशेष मौसम बुलेटिनमा भनिएको छ : यस वर्ष दसैँको सप्तमी (२४ गते), अष्टमी/नवमी (२५ गते) र दशमी (२६ गते) का दिनहरूमा कोसी प्रदेश र मधेस प्रदेशलगायत बागमती प्रदेश र गण्डकी प्रदेशका पहाडी भूभागमा आंशिकदेखि साधारणतया बदली रही कोसी प्रदेश र मधेस प्रदेशका थोरै स्थानमा तथा बागमती प्रदेश र गण्डकी प्रदेशका पहाडी भूभागका एक/दुई स्थानमा मेघगर्जन/चटयाङसहित हल्कादेखि मध्यम वर्षाको सम्भावना रहने तथा बाँकी भूभागमा आंशिक बदलीदेखि मौसम मुख्यतया सफा रहने देखिन्छ। साथै उक्त दिनहरूमा अधिकांश स्थानमा अधिकतम तथा न्यूननतम तापक्रम सरदरभन्दा थोरै घट्ने सम्भावना रहेको देखिन्छ।
हेर्नुहोस् मौसम महाशाखाले जारी गरेको यो बुलेटिन-
