काठमाडौं – जुझारु युवाहरुको सक्रियतामा स्वतस्फूर्त रुपमा हरेक वर्ष जनवरी १ का दिन मनाइँदै आइएकाे अन्तर्राष्ट्रिय नेपाली टोपी दिवस यस वर्ष पनि मनाइने भएको छ ।
टाेपी दिवसकाे आयाेजक जागरुक युवा अभियान नेपालले हरेक अंग्रेजी नयाँ वर्षको अवसर पारेर विगत १२ वर्षदेखि नेपाली टोपी दिवस मनाउँदै आइरहेको छ ।
यस वर्ष पनि काठमाडौंको बसन्तपुरमा एक कार्यक्रम गरी १२ औं अन्तर्राष्ट्रिय टोपी दिवस मनाइने जागरुक युवा अभियान नेपालले जनाएकाे हाे । यस वर्ष पनि विभिन्न कार्यक्रमका साथ अन्तर्राष्ट्रिय टोपी दिवस मनाइँदैछ ।
विगतदेखि नै नेपालीलाई चिनाउँदै आएको ढाकाटोपी र भादगाउँले कालाेटोपीलाई राष्ट्रिय पहिचानका रुपमा घोषणा गर्न संस्थाले सरकारसँग जोडदार माग गरेको छ । ०६८ सालमा तत्कालिन प्रधानमन्त्री बाबुराम भट्टराई नेतृत्वकाे सरकारले राष्ट्रिय पाेशाक हटाएपछि जागरुक युवाहरुले राष्ट्रिय पहिचान संकटमा परेको भन्दै यसलाई बचाउन आव्हान गर्दै आएका छन् । अभियन्ताहरुले यस वर्ष पनि पुस १७ गते अंग्रेजी नयाँ वर्षका दिन राजधानीकाे वसन्तपुरमा बिहान ८ बजे जम्मा भएर गरिने कार्यक्रममा सहभागी हुन सबैलाई अनुराेध गरेको छ ।
