काठमाडौं – नेपालले फोर नेसन्स उमन्स इन्टरनेसनल फुटबल च्याम्पियनसिपमा विजयी सुरूवात गर्दै किर्गिस्तानलाई १-० ले पराजित गरेको छ। दशरथ रंगशालामा भएको खेलमा विमला चौधरीले निर्णायक गोल गर्दै नेपाललाई महत्वपूर्ण तीन अंक दिलाइन्।
नेपालले खेलभरि नै दबाब सिर्जना गरे पनि गोल गर्ने अवसरलाई सदुपयोग गर्न संघर्ष गर्यो। खेलको छैटौं मिनेटमै नेपालले गोल गर्ने मौका बनायो, तर रेखा पौडेलको प्रहार किर्गिस्तानकी गोलकिपर दिलनुरा अबिबुल्लाहले बचाइन्। त्यसको चार मिनेटपछि, सबिता राना मगरको सटिक पासमा विमला चौधरीले हेडरमार्फत खेलको एक मात्र गोल गरिन्।
नेपालले पहिलो हाफमै थप अग्रता लिने अवसरहरू पाए पनि फिनिसिङमा कमजोरी देखियो। प्रिती राईको फ्री-किकमा विमला चौधरीको प्रहार गोलकिपरले बचाइन भने रेणुका नगरकोटीको प्रहार थोरै अन्तरले बाहिरियो। पहिलो हाफको इन्जुरी समयमा रश्मी कुमारी घिसिङ र सबिता राना मगरका प्रहार क्रसबारमा लागेर फर्किए।
दोस्रो हाफमा नेपालले खेलमा थप ऊर्जा भर्ने प्रयास गर्यो। डिफेन्डर विमला विकलाई रिप्लेस गर्दै स्टार स्ट्राइकर साबित्रा भण्डारी मैदान प्रवेश गरिन्। नेपालले आक्रमणको लय जारी राखे पनि किर्गिस्तानको डिफेन्स पार गर्न सकेन। खेलको ५३औं मिनेटमा विमला चौधरीले हातले गोल गरेपछि रेफ्रीले पहेंलो कार्ड दिइन्। ८२औं मिनेटमा सबिता राना मगरको प्रहार पोष्टको नजिकैबाट बाहिरियो।
अन्ततः नेपालले १-० को जित निकाल्दै प्रतियोगिताको सफल सुरूवात गर्यो। यसअघि भएको अर्को खेलमा म्यानमारले लेबनानलाई ३-१ ले हराएको थियो। समुहको अंकतालिकामा नेपाल र म्यानमार समान ३-३ अंकसहित अगाडि छन्।
अब नेपालले आगामी शुक्रबार लेबनानको सामना गर्नेछ। यस खेलमा नेपालले फिनिसिङ सुधार्दै जितको लय कायम राख्न प्रयास गर्नेछ।
