काठमाडौं – म्यानमारले लगातार दोस्रो जित निकाल्दै फोर नेसन्स उमन्स इन्टरनेसनल फुटबल च्याम्पियनसिपको फाइनल पुग्ने सम्भावनालाई बलियो बनाएको छ। दशरथ रंगशालामा बिहीवार भएको पहिलो खेलमा म्यानमारले किर्गिस्तानलाई ५-० को फराकिलो अन्तरले पराजित गर्यो।
एकपक्षीय बनेको खेलमा म्यानमारका लागि मे टेट लु र योन वाडी लेङले समान दुई गोल गरे भने कप्तान सानदार लिनले एक गोल गरिन्।
खेलको दोस्रो मिनेटमै म्यानमारले अग्रता लिएको थियो। कप्तान सानदार लिनको क्रसमा वाडी लेङले गोल गर्दै टोलीलाई अगाडि बढाइन्। नवौँ मिनेटमा किर्गिस्तानकी एलिखान टर्मसको प्रहार म्यानमारकी गोलरक्षकले उत्कृष्ट बचाउ गर्दै टोलीलाई अग्रता जोगाइन्।
खेलको ३०औँ मिनेटमा सानदार लिनले व्यक्तिगत उत्कृष्ट प्रदर्शन गर्दै म्यानमारका लागि दोस्रो गोल गरिन्। ३६औँ मिनेटमा योन वाडीको पासमा मे टेट लुले हेडरमार्फत गोल गर्दै म्यानमारको अग्रता ३-० बनाए। ४१औँ मिनेटमा युन वाडी लेङले गोल गर्दा पहिलो हाफको अन्त्यसम्म म्यानमारले ४-० को स्पष्ट अग्रता बनाइसकेको थियो। उनको डिबक्स भित्रबाट गरेको प्रहार क्रसबारमा लाग्दै गोलमा परिणत भएको थियो।
खेलको दोस्रो हाफमा पनि म्यानमारले आक्रमण जारी राख्यो। ४९औं मिनेटमा मे टेट लुले व्यक्तिगत दोस्रो गोल गर्दै म्यानमारलाई ५-० को स्पष्ट अग्रता दिलाइन्।
म्यानमारले यसअघि पहिलो खेलमा लेबनानलाई ३-१ ले हराएको थियो। दुई खेलबाट ६ अंक जोड्दै फाइनल यात्रा बलियो बनाएको छ।
यता, किर्गिस्तानले लगातार दोस्रो हार बेहोरेको छ। पहिलो खेलमा नेपालसँग १-० ले पराजित भएको किर्गिस्तानको फाइनल सम्भावना समाप्त भएको छ।
आज साँझ ६ बजे हुने दोस्रो खेलमा नेपाल र लेबनान आमनेसामने हुँदैछन्। नेपालको फाइनल सम्भावना जीवित राख्नका लागि जित अनिवार्य हुनेछ।
