चितवन – गोर्खाली रग्वी क्लबको आयोजनामा फागुन १६ र १७ गते (फेब्रुअरी २८ र मार्च १, २०२५) चितवनको भरतपुर महानगरपालिका–७ स्थित कृष्णपुर रंगशालामा गोर्खाली रग्वी सेभेन्स पुरुष राष्ट्रिय प्रतियोगिता–२०८१ सञ्चालन हुने भएको छ। प्रतियोगितामा गोर्खालीसहित दुई विभागीय टिम नेपाल आर्मी र एपीएफसहित पाँच प्रदेशका टिमको सहभागिता रहनेछ।
नेपाल रग्वी संघमा २०७४ सालदेखि आवद्ध गोर्खाली रग्वी क्लब राष्ट्रिय तथा अन्तर्राष्ट्रिय प्रतियोगितामा आफ्नो प्रभावशाली प्रदर्शन गर्दै आएको छ। क्लबले यु-१८, यु-२० तथा राष्ट्रिय सेभेन्स ए साइड प्रतियोगिताहरूमा उत्कृष्ट प्रदर्शन गर्दै गत वर्ष फिप्टिन्स ए साइड रग्वी प्रतियोगितामा विजेता बन्न सफल भएको थियो।
क्लबले कर्णाली रग्वी संघसँग दुई वर्षका लागि सहकार्य गरी कर्णाली प्रदेशका विभिन्न जिल्लामा प्रशिक्षक परिचालन गरेको थियो। यस अभियान अन्तर्गत कर्णाली प्रदेशलाई राष्ट्रिय प्रतियोगितामा यु-१४, यु-१८, यु-२० तथा सिनियर विधामा विजयी बनाउन सफल भएको क्लबको इतिहास रहेको छ।
हाल नेपालको राष्ट्रिय रग्वी टिममा क्लबका १२ खेलाडी आवद्ध छन्। क्लबले राष्ट्रिय तथा अन्तर्राष्ट्रिय स्तरमा प्रतिस्पर्धा गर्न योग्य खेलाडी उत्पादन गरिरहेको छ।
प्रतियोगिता लिग चरणमा खेलाइनेछ, जसमा कुल १३५ खेलाडी सहभागी हुनेछन्, भने अफिसियल, मेडिकल टिम र स्वयंसेवक गरी १६५ जनाको सहभागिता रहनेछ। विजेता टिमले रु. २ लाख नगद, ट्रफी, मेडल तथा प्रमाणपत्र प्राप्त गर्नेछ भने उपविजेता टिमले रु. १ लाख नगद, मेडल तथा प्रमाणपत्र प्राप्त गर्नेछन्।
नेपालमा हालसम्म आयोजना भएका रग्वी प्रतियोगिताहरूमा नगद पुरस्कार राखिएको यो पहिलो प्रतियोगिता भएको क्लबका सचिव प्रेम कोइरालाले जानकारी दिए।
