काठमाडौं– घरेलु टिम नेपाललाई २–० ले पराजित गर्दै म्यानमारले चारदेशीय अन्तर्राष्ट्रिय महिला च्याम्पियनसिपको उपाधि हात पारेको छ। बुधबार त्रिपुरेश्वरस्थित दशरथ रंगशालामा सम्पन्न फाइनल खेलमा म्यानमारले दोस्रो हाफमा दुई गोल गर्दै उपाधि जित्न सफल भयो।
खेलको ६२औँ मिनेटमा म्यानमारकी यु पर खिनले डी-बक्स नजिकबाट उत्कृष्ट प्रहार गर्दै टिमलाई अग्रता दिलाइन्। त्यसको दुई मिनेटपछि, ६४औँ मिनेटमा फ्यु फ्यु विनको फ्रि-किकलाई सदुपयोग गर्दै कप्तान विन थेंगी टेनले गोल गरिन्। त्यसपछि नेपालले खेलमा फर्कने प्रयास गरे पनि गोल गर्न सकेन।
पहिलो हाफमा दुवै टिमले केही गोलका अवसर सिर्जना गरे पनि सदुपयोग गर्न सकेनन्। खेलको २४औँ मिनेटमा नेपाली रक्षक विमला बिकले उत्कृष्ट बचाउ गर्दै विपक्षीको हमला रोकेकी थिइन्। ३५औँ मिनेटमा सावित्रा भण्डारी (साम्बा) को प्रहार म्यानमारकी गोलकिपर म्यान नेइनले रोकेपछि नेपाल अग्रता बनाउन असफल रह्यो। ४४औँ मिनेटमा रेनुका नगरकोटेले दिएको क्रसमा सावित्राको हेडर पोस्टमा नजाँदा नेपालले अर्को सुवर्ण अवसर गुमायो।
यसअघि लिग चरणमा यी दुई टोलीबीचको खेल २–२ को बराबरीमा टुंगिएको थियो। तर, फाइनलमा म्यानमारले प्रभावशाली प्रदर्शन गर्दै नेपाललाई पराजित गर्यो। जितसँगै म्यानमारको टिमले मैदानमा खुसी साटासाट गरेको थियो।
नेपालले प्रतियोगितामा सानदार यात्रा गरे पनि फाइनलमा चाहेजस्तो नतिजा निकाल्न सकेन।
