काठमाडौं – नेशनल इभेन्ट म्यानेजमेन्ट एशोसियसन (NEMA) को प्रथम अधिवेशन सम्पन्न भएको छ। उक्त अधिवेशनबाट रवि धमला अध्यक्ष पदमा निर्वाचित भएका छन्।
संस्थापक अध्यक्ष तथा नेपलिज फेशन होमकी अध्यक्ष हेमा मानन्धरको प्रमुख आतिथ्यतामा सम्पन्न कार्यक्रममा ११ सदस्यीय नयाँ कार्यसमिति चयन गरिएको छ।
नयाँ कार्यसमितिमा शुसीला थापा उपाध्यक्ष, डेभिल सिंह राजपुत सचिव, नितु श्रेष्ठ कोषाध्यक्ष, कृष्ण श्रेष्ठ सहसचिव, तथा विशाल पासवान सहकोषाध्यक्ष पदमा चयन भएका छन्। त्यस्तै, भरत समारी, अमिसा वली, समसाद शाह, छिरिङ शेर्पा, र रवि लामा तामाङ सदस्य पदमा निर्वाचित भएका छन्।
कार्यक्रमलाई सम्बोधन गर्दै प्रमुख अतिथि हेमा मानन्धरले नेपालका सम्पूर्ण कार्यक्रम आयोजकहरूको हकहितका लागि निरन्तर आवाज उठाउँदै संघलाई अघि बढाउनुपर्नेमा जोड दिइन्। साथै, नवनिर्वाचित कार्यसमितिलाई शुभकामना दिँदै इभेन्ट म्यानेजमेन्ट क्षेत्रलाई थप व्यवस्थित बनाउन संघले प्रभावकारी भूमिका खेल्ने अपेक्षा व्यक्त गरिन्।
नवनिर्वाचित अध्यक्ष रवि धमलाले इभेन्ट व्यवस्थापन क्षेत्रमा क्रियाशील व्यक्तिहरूलाई एकताबद्ध गर्दै उनीहरूको हकहित र विकासका लागि काम गर्ने प्रतिबद्धता व्यक्त गरे। नेपालभर विभिन्न कार्यक्रम आयोजना तथा व्यवस्थापन गर्ने व्यवसायीहरूलाई एउटै मञ्चमा ल्याई व्यवस्थित र व्यवशायिक रूपमा अगाडि बढाउने संघको उद्देश्य रहेको उनले बताए।
संघको यो पहलले नेपालमा इभेन्ट व्यवस्थापन क्षेत्रलाई संस्थागत गर्न महत्वपूर्ण भूमिका खेल्ने अपेक्षा गरिएको छ।
