रामेछाप, मन्थली – राष्ट्रिय फोटो पत्रकार समूह, नेपाल (एनएफपिजे) जिल्ला शाखा रामेछापले आदिवासी जनजाति पत्रकार महासंघ (फोनिज) बागमती प्रदेश महाधिवेशनको अवसर पारेर रामेछापको ऐतिहासिक, धार्मिक, पुरातात्त्विक र पर्यटकीय सम्भावनालाई उजागर गर्ने उद्देश्यले जिल्लाको इतिहासमै पहिलो पटक फोटो प्रदर्शनी आयोजना गरेको छ।
रामेछापको तीनलाल पार्क, मन्थलीमा सम्पन्न प्रदर्शनीमा ५० वटा उत्कृष्ट तस्वीरहरू राखिएको थियो, जसले जिल्लाको सौन्दर्य, सम्भावना र सांस्कृतिक धरोहरलाई उजागर गरेको छ।
पत्रकारिता समाचार लेख्ने र खबरदारी गर्ने काममा मात्र सीमित हुनुहुँदैन, बरु व्यावहारिक रुपमा पनि सक्रिय हुनुपर्छ भन्ने हाम्रो प्रतिबद्धताको प्रतिबिम्बस्वरूप यो प्रदर्शनी आयोजित गरिएको एनएफपिजे रामेछापका अध्यक्ष मिलन घिमिरेले जानकारी दिए । फोटोप्रति रुचि राख्ने ‘घुमन्ते मित्रहरू’ तथा फोटो पत्रकारितामा संलग्न व्यक्तिहरूका लागि यो प्रयास महत्वपूर्ण कदम सावित भएको उनले बताए ।
अध्यक्ष घिमिरेले आर्थिक तथा प्राविधिक कठिनाइका बाबजुद पहिलो प्रयासस्वरूप प्राप्त सुझावहरूले आगामी दिनका लागि थप प्रेरणा मिल्नुका साथै विभिन्न जिल्लाबाट आएका फोटो पत्रकारहरूसँग अनुभव आदान–प्रदान गर्दै ‘एग्जिबिशन’ को क्षेत्रमा नयाँ ज्ञान हासिल गर्ने अवसर पनि प्राप्त भएको बताए ।
कार्यक्रममा नेपाल सरकारका ऊर्जा, जलस्रोत तथा सिँचाइ राज्य मन्त्री पूर्णबहादुर तामाङ (कान्छाराम), प्रदेश सांसदद्वय तारानारायण श्रेष्ठ र आनन्द कुमार श्रेष्ठ, रामेछापका प्रमुख जिल्ला अधिकारी राजु प्रसाद पौडेल, पत्रकार महासंघ बागमती प्रदेश अध्यक्ष कृष्ण सारू मगर, जिल्ला अध्यक्ष दीपक कुमार घिमिरे, प्रदेश सञ्चार रजिष्ट्रार प्रमुख रेवती प्रसाद सापकोटा, एनएफपिजे नेपालका केन्द्रीय वरिष्ठ उपाध्यक्ष लेखबहादुर श्रेष्ठ (सागर), कोषाध्यक्ष प्रदीप कुमार श्रेष्ठ, (डिएसपी) प्रदीप कुमार सिंहसहित जिल्लाका सबै सुरक्षा निकायका प्रमुखहरू लगायत बागमती प्रदेशका पत्रकारहरूको उपस्थिति रहेको थियो।
